Buroyê Huqûqî yê Asrinî derheqê pêvînayîşê 4. ke Îmrali de ame viraştene de melumat da û mesajê Ocalanî pare kerd. Goreyê eşkeraya Ocalanî avûkatan ra qala Îttîfaqê Demokratîke ke şexsê HDPyî de vejîyeno aver, kerda û wina vato: “HDP do qeraranê xo bido û HDP ganî rayîrê xo bipawo.”
Avûkatanê Buroyê Huqûqî yê Asrinî netîceyê pêvînayîşê 4. ke 18ê Hezîrane de Îmrali de Rayberê Şarê Kurdî Abdullah Ocalanî de viraştbi, eşkera kerd û mesajê Ocalanî pare kerd. Buroyê Huqûqî yê Asrinî muhtewaya pêvînayîş de melumat dayî û bitaybetî bale anto rewşa HDPyî ser.
Goreyê avûkatan, Ocalanî pêvînayîş de bale anto îttîfaqê demokratîkî yê HDPyî ser û waşto ke wa HDP nê îttîfaqî nêkero babeta weçînayîş û sewbîna. Avûkatan vatişê Ocalanî wina neqil kerd: “Ocalan wexto ke nêyî va, qala pêkerdişê komelkî kerdêne û vatêne ke gerek ti kes nêbo haletê cîyakerdişî. Sîyasetê cîyakerdişî heqaret û demagojî yo. Cok ra ganî HDP rayîrê xo bipawo. HDP do bi xo qeraranê xo bido.”
Avûkatan eşkerayîya xo de qala bi nameyê Alî Kemal Ozcanî de kesêkî zî kerdo û wina vato: “Wexto ke ma seba pêvînayîşî amadekarîyê xo kerdêne, ma dî ke çapemenîye de qala pêvînayîşê Alî Kemal Ozcanî yena kerdêne. Ey kesî îdîa kerdêne ke şîyo Îmrali û Ocalanî de pêvînayîş viraşto. Ma nêzaneyêne ke bêxera avûkatan kes eşkeno şêro Îmrali. Haya ma muhîmîya vatişê muwekkîlê ma de esta, cok ra ma zaf dîqet kenî û ma na babete de bi no hawa nêzikê her kes yan zî dezgehan benî.”
HDPyî çareserîya demokratîke esas girewto
Buroyê Huqûqî yê Asrinî mesajê Ocalanî yê nuştekî pare kerd. Ocalanî mesajê xo de vato ‘Mi derheqê grevê vêşanîye û rojeyê mergî de înîsîyatîfê şexsî girewt û mi lazimî dî ke ez nê îzehetî bikera’ û wina domnayo: “Mi qala tewirêko ke zelal nêbîyo û nêameyo kûrkerdene kerde. Goreyê averşîyayîşan ez wina nizdîyê mesela bîya. Bi taybetî averşîyayîşanê ke pey prosesê çareserîye de vejîyayî werte ra yeno famkerdene ke sîyaseto cîyakar û şerwaştox, problemanê komelî hîna zaf giran keno. Vera Îtttîfaqanê Komar û Milletî de Îttîfaqê Demokratîke yê HDPyî çareserîya demokratîke esas girewto.”
Ganî nêkerî qurbanê munaqeşeyanê weçînayîşî
Ocalanî mesajê xo de qala muhîmîya Îttîfaqê Demokratîke kerdo û mesajê Ocalanî wina qedîyayo: “Rojanê ameyeyan de beno ke problemê mîyanên û neteweyî hîna giranêr bibî. Cok ra no rayîrê hîrêyin zaf muhîm o û ganî manayêka hîra bidîyo nê rayîrî. Na çarçewa de ganî zîhnîyetê Îttîfaqê Demokratîke ke şexsê HDPyî de vejîyeno werte, nêbo qurbanê munaqeşeyanê weçînayîşî. Muhîmî û manaya Îttîfaqê Demokratîke o yo ke mîyanê munaqeşeyan de nêmaneno û bi hawayo xoser beşdarê weçînayîşî beno. Xetêka winasî esas gêno. Goreyê mi xeta ke pêkerdo demokratîk, sîyaseto azad û huqûqo unîversal esas gêna, xeta tewr raşte ya. Ez veng dana heme hetan ke wa no het de hesas bibî. 18.06.2019. Zîndanê Padaye yê Îmrali. Abdullah Ocalan.”
MA / STENBOL