Hemsereka Konseyê Caardişî yê KCKyî Besê Hozate xoverdayîşê Kurdan silam kerd wina va: “Vera faşîzmê AKP û MHPyî de xoverdayîşêko erjaye esto. Tena bajaranê Amed, Wan, Mêrdîn û Stenbol de xoverdayîşî estî. Labelê çira heme bajaran de xoverdayîş çin o? Ganî heme bajaran de xoverdayîş bibo.”
MEDYA HAWAR / ANF / BEHDÎNAN
Hemsereka Konseyê Caardişî yê KCKyî Besê Hozate beşdarê programêkê televîzyonî bîye û çîyê ke rojeve de bîy ser o qisey kerde. Hozate sere de xoverdayîşê Kuran silam kerd û wina va: “Vera faşîzmê AKP û MHPyî de xoverdayîşêko erjaye esto. Ewro Amed, Wan, Mêrdîn û Stenbol de xoverdayîşî estî, labelê çira heme bajran de xoverdayîş çin o? Ma omid kenê ke do no xoverdayîş heme bajaran de bibo.”
Hozate dewamê qiseykerdişê xo de va ‘Rixmê heme hêrişanê îqtîdarî şar wayîrê îradeya xo vejîyeno’ û wina dewam kerd: “Xoverdayîş de rolê cinîyan zaf mûhîm o. Heme xoverdayîşan de cinîyî tewr vernî de cayê xo gênê. No xoverdayîşî hîna keno bimana û bihêz. Îqtîdar sîyasetê çinkerdişê Kurdan rayra beno. Xespkerdişê şaredarîyanê Amed, Wan û Mêrdînî zî leteyêkê nê sîyasetî yo. Seba ke qezencanê Kurdan werte ra wedarnê Surîye û Îraq de zî kewtî mîyanê şerî. Tirkîya xora bi serren o şer de ya.”
Hozate qiseykerdişê xo de mesajê Rayberê Şarê Kurdî Abdullah Ocalanî ser o vindete û wina va: “Nizdîbîyayîşê Rayberîye zaf muhîm o. Rayberîye ameyoxê Tirkîya vîneno û goreyê ci ercneno. Ganî pêvînayîşê Rayberîye hol bêrê famkerdene. Senî ke ma eşnawito ercnayîşê cîya-cîyayî estî. Tayî vanê Îmrali de pêvînayîş estî, çareserî pawenê û sewbîna. No nizdîbîyayîş û ercnayîşêko xelet o. Eke Tirkîya wazena mesele çareser bikero, muxatap Rayberîye yo. Seba ke Rayberîye mesele çareser bikero, ganî dewlete raşt nizdî bibo. Semedê çareserîya meseleya Kurdî, plan, proje û fîkrê Rayberîye estî. Tîya de hetê dewleta Tirkî ra problem esto. Eke dewleta Tirkî razî bibo, meseleya Kurdî yena çareserkerdene. Tena bi Rayberîye çareser nêbena. Ganî dewleta Tirkî zî seba çareserîye qerar bido.”
PKK 40 serrî yo têkoşîn dano
Hozate qiseykerdişê xo de qala hewldayîşê çareserîye yê PKKyî kerde û wina va: “Sebebê meseleya Kurdî Rayberîye nê, dewleta Tirkî ya. Xora vejîyayîşê Rayberîye semedê çareserîya meseleya Kurdî bi. PKK 40 serrî yo ke semedê çareserîya mesele têkoşîn dano. Semedê azadkerdişê Rojhelatê Mîyanênî, semedê pîya ciwîyayîşê Kurd, Tirk û heme şaranê bînan têkoşîn dano. Dewleta Tirkî Kurdan înkar kerd û bi serran vera Kurdan de polîtîkaya qirkerdişî rayra berde. Ewro AKP û MHP zî heman polîtîka rayra benê.”
Kurdî wazenî bibî wayîrê statuyî
Hozate qiseykerdişê xo de bale ant statuwaştişê Kurdan ser û wina qedênaye: “Rayberîye vano ke ‘ez çareserîye rê amade ya’. Ganî dewleta Tirkî zî naye vaja. Eke dewleta Tirkî çareserîye rê amade ya, plan û projeyê ci estî, wa bêrê ma muneqeşa û muzakere bikerê. Rayberîya ma vano ke ‘Ez amade ya, eke dewlete amade ya, wa bêrê ma na mesele hewteyêk de çareser bikerê’. Semedê çareserîye ganî dewleta Tirkî qerar bido û şêro Îmrali. Waştişê Rayberîye û Kurdan eşkera yo. Kurdî wazenê ke bibê wayîrê statuyî. Wazenê ke nasnameyê înan ê kulturkî û sîyasî bêrê naskerdene. Vakur de statuyo demokratîk Tirkîya letê nêkeno. Kurdî dewlete nêwazenî. Dewlete îqtîdar o, zulm o, îşkence yo, şer û qetlîyam o. Ma nêvanê wa dewletî werte ra bêrê wedarnayene, ma vanê wa dewletî demokratîk bê.”