Vera xespkerdişê şaredarîyan û tayînkerdişê qayûman de Kurdîstan û Ewropa de çalakîyî dewam kenî. Dêrsim de çalakîya vera qayûman ê Amed, Wan û Mêrdînî dewam kerde.
Tayê temsîlkarê partîyanê sîyasîyan û Rêxistinanê Cimatê Sivîlî zî paştî daye ci çalakîya ke Rasteyê Seyîd Rizayî de ameye viraştene. Çalakîye de îzehet ame dayene û îzehet hetê vervatoxa Meclîsê Cinîyanê HDPyî yê Dêrsimî Nûrşat Yeşîle ra ameye wendene.
Yeşîle qayûmî sey derbeyêka sîyasîye name kerdî û wina va: “Şaredarîyanê Kurdan de caakerdişê qayûmî eşkera tewirêko dişmenkî yê vera Kurdan o. Reyna na polîtîkaya hêrişkare destkewteyanê cinîyan zî hedef gêna. Qayûmî tewr verê hêrişê sîstemê hemserekîye kenê. Qayûm îradeyê cinîyan û heme şarê ma xesp keno û no qetîyen nêno qebulkerdene. Ganî heme hêzê demokratî, partîyê muxalefetî, sendîkayî û dezgehê cimatê sivîlî vera nê îqtîdarî yo ke îradeyê şarî xesp keno, vengê xo berz bikerê.” Eşkerayîye ra dima çalakîya roniştişî ameye viraştene.
PÎRHA / DÊRSIM