Grevê vêşanî ke Nurîye Gulmene û Semîh Ozakçayî seba agêrayîşê karê xo daybî destpêkerdiş roja 181. de dewam keno. Gulmene û Ozakça nika Nêweşxaneyê Zîndanê Sîncanî ke bi hawayo zorî ameybî berdiş de manenî.
Sey ke yeno zanayîş Gulmene û Ozakça roja 76. ya çalakîya grevê vêşanîye de ameybî tepiştiş û çend rojî verê zî roja mehkemeya înan dîyar bîye. Gulmene û Ozakça do 14ê êlule de bivejyî mehkeme. Gulmene û Ozakça bi mabênkarîya avûkatanê xo mesajêk erşawitî.
Gulmene û Ozakçayî mesajê xo de vatî ‘ma 100 rojî ra zêde yo ke tewqîfkerde yî’ û mesajê înan wina dewam kerdo: “Herçiqas ke zext, teda û kampanyayê sîyakerdişî yenî meşnayîş, reyna zî xoverdayîşê ma bi heqdarî û sadeyîya xo dewam keno. Roja mehkeme çalakîya ma do biresa roja 190. û ma zî do 190 rojanê vêşanîye mehkeme de vajî. Çimkî çîyo ke ma nê hucreyan ra rizgar bikero, edaletê kesê ke nê mehkemeyan awan kerdî nîyo, wayîrvejîyayîşê şima yo. Ma nêyî baş zanî.”
Ganî şima ewja de bibîy
Gulmene û Ozakçayî dewamê mesajê xo de bale antî ser vindetişê xo û mesaj wina domîyayo: “Şarê Tirkîya û yê cîhanî, tena seba ma nê, seba pawitişê heqê ma yê merdimîye, reyna seba ke ma nîşan bidîy ke têkoşînê rûmet û nane yê kedkaranê rayapêroyîyan nîno mehkemekekerdiş û seba heme bindest û feqîran ganî şima ewja de bibîy. Badê 114 rojan bi hawayo fîzîkî mîyanê şima de bîyayîş û dostî û embazîya şima hîskerdiş seba ma heyecanêko gird o. Ma do yewbînan bivînî.”
Heto bîn ra grevê vêşanî yê Esra Ozakçaye ke roja Nurîye û Semîh ameybî tepiştiş, daybî destpêkerdiş zî roja 106. de dewam keno. Çalakîya ke seba piştîdayîşê Gulmene û Ozakçayî Caddeyê Yukselî de yena viraştiş zî 300 rojan pey xo de verdaye û kewt roja 301.
ANF/STENBOL