Konfederasyonê Sendîkayanê Kedkaranê Şorişgeran (DÎSK) welatê ke bi demokrasîya parlamentere, serekî û nîm serekî yenî îdarekerdiş de heq û huqûqanê karkeran da têver û karkeran ra waşt ke wa referandûm de bivajî ‘nê’. Koordînatorê DÎSK-Arî Doç.Dr. Hakan Koçakî babete ser o qisey kerd.
Heq û huqûqê karkeran hîna tepîya yo
Koçakî va ‘ma sey DÎSK, welatê ke bi sîstemê serekî yenî îdarekerdiş de heqê merdiman ser o cigêrayîşêk viraşt’ û wina domna: “Goreyê nê cigêrayîşî şert û mercê karkeran welatê ke bi sîstemê serekî yenî îdarekerdiş de heq û huqûqê karkeran hîna tepîya yo. Sîstemê parlamenterî de rewşa karkeran hîna baş a. No heme hetan ra wina yo.”
Sey peymana karî bifikiryênê
Koçakî dewamê qiseykerdişê xo de va ‘Cok ra wexto ke karkerî referandûm de tercîhêk bikerî, ganî nê referandûmî sey peymanêka karî bivînî. Ma sey Sendîka tim karkeran ra vanî hetta ke şima peymana karî nêwanî, îmze mekerê. Çîyo ke şima îmze bikerî, ganî baş kontrol bikerî. Eke qanûno bingeyî peymanêka komelkî ba, ganî ewil kedkarî bêrî zanakerdiş; çira do tesdîq bikerî, înan rê bêro vatiş.”
STENBOL