Badê ke qayûmî tayînê şaredarîyanê kurdan bîyî, heme komeleyê ke vera fuhuş û tiryakî de têkoşîn dayênê padayî. Tayînkerdişê qayûman ra dima Kurdistan de hûmara kesê ke madeyê tiryak û karê fuhuşî kenî, zêde bîyî. Çeteyê ke bitaybetî domanan hedef gênî, taxê kurdan ser de vila benî. Dewlete bi zanayîş çeteyan erşawena nê taxan û seba letebîyayîşê kurdan çîmê xo neheqîyan rê padana. Babete ser o Sosyolog Umran Nare qisey kerde.
Nare destpêkê qiseykerdişê xo de va ‘hûmara îstîsmar, tacîz, hêrişo cînsel û tiryakî her ke şono zêde bena’ û wina dewam kerde: “Heme dozanê îstîsmarî rê qerarê nimiteyî yeno dayîş. Hesaban ra vatî ke şebekeyê çeteyan Êlih de ameyî tepiştiş. La ame zanayîş ke tena 3 kesan tepiştî. Çîyê winasî merdiman teşwîqê sucan kenî.“ Nare vist vîrî ke ganî domanî teşwîqê spor û kulturî bêrî kerdiş û wina va: “No proses de bar keweno komeleyan ser. Ganî keye bi keye xebatê zanayîşî bêrî kerdiş. Xohesnayîş û zanakerdişê komelî karê ma yo. Cinîyê ke verê cû no het de xebetîyayî, ewro ma rê rayberî kenî.”
ŞÛJIN/AMED