Hemserokê Pêroyî yê HDP Selahattîn Demîrtaş ke rojdema peynî ser o DÎHA rê qisey kerd, vist vîrî ke ê polîtîkayanê leymin ra nêtersenê. Demîrtaşî aşkere kerd ke iyê dê heta solixa peynî xover bidê. 

Demîrtaşî hayr ant bi şiklekê bêhiqûqî binçimgirewtişê Hemşaredaranê Amedî Gultan Kişanak û Firat Anli ser û vist vîrî ke dozgerî hona ti îdianame hadre nêkerdo û va, la dosyayeke bi delîlanê komplovarî ameya hadrekerdiş. Demîrtaşî da zonayen ke çîyê ke derheqê Kişanak de zey sûc yenê vînayen babedê zey ‘xoserî pawito, bi qiseyanê xo rêxistin pawito.’ Demîrtaşî aşkere kerd ke mordem êşkenê nînan çarçoveyê bi heqê sîyasete û azadîya fikrî de penase bikero, la sûc nîye. Goreyê vatenanê Demîrtaşî seba Anli zî rîwalo ke aw kirêştîya şehîdgeheke gerîllayan zey sûc yeno vînayen. 

Hemserokê HDP dîyar kerd ke tayî dosyayê ke çapemenîya  hewzê kena nîzam û bi propagandayê qirêrîn zey ‘Pêrokîn îmkanê şaredarî ruşnayê koyî’ ti eleqeyê xo çinyo. Demîrtaşî vist vîrî ke binçimgirewtişê Hemşaredaran çiyekê bêhiqûqî yo. Qanûnê ke estê zî binling kenê û va, eke qerarekê tepiştişî bivejyo do tam komkiştenekê  hiqûqî bo. 

Hêriş qat bi qat vêşêr bi

Derheqê persa îxtimalê tepiştişan de zî Selahattîn Demîrtaşî aşkere kerd ke rîwalo ke 2017î de planê înan yê weçîntayişê lezî esto û tersenê ke HDP plananê înan serûbin bikero. Demîrtaşî va wazenê ma bi no şiklî bypass bikerê, teberê sîyasetî de biternê ke hesabê kampanyaya weçîntayişî rihet bikerê û wina dewam kerd: “Nê hesabê înan do cayê xo nêgîro. Beno ke Kişanak û Anli bigîrê, beno ke mi zî bigîrê, la iyê dê şarî se bikerê? Ê ki na tekoşîn avey benê 3-4 kesî nîye, bi mîlyonan kesî estê.”

Demîrtaşî hayr ant îlankerdişê rewşa îstîsnayî û nêrazîbîyenî şarî ser û wina va: “Mudaxaleyê wişt kesê ke vejyay meydanan kerdî, înan girotî û înfaz kerdî. Mekanîzmayê êrîşê yê tersî ser şarî vistî dewre. Ser nayî badê hewldana derbe OHAL ame. Hêriş qat bi qat vêşêr bi. Çapemenî zî pêrokîn girotî. La ma gureyînanê şarî ra rî bi rî yhe. Her şan embazê ma tax bi tax keye bi keyeyan geyrenê, kombîyayişan virazenê. Hêrsa şarî ti wext qasê nika vêşêr nêbî. Şarê ma dûştê bêhiqûqî û binlingkerdişê heqan bi hêrsî yê.”

Demîrtaşî da zonayen ke iyê dê neyra tepya zî pêrokîn cayan de bi şarî ra bîrê pêhet û gureyînanê xo biramnê.  

‘Beno ke suîqastî viraziyê’

Hemserokê Pêroyî yê HDP Selahattîn Demîrtaşî aşkere kerd ke beno ke dûştê sîyaseta demokratîk hêrişê girdî bibê û va, winî ayseno ke dê dewra newî de sûîkastan zey konseptekê newî bivisyê dewre, zey serranê ’90î bi destê tetîkêşan, kontrayan, tayî çormeyanê leymin nê karanê pîsî bidê ramiten.” Demîrtaşî vist vîrî ke Wezîrê Karê Zerrî yê nikayî tam merdimekê karê pîsî yo û va, seba ke karê xo yê qilêrîn bidê ramiten ey ardîyê ser kar. 

Selahattîn Demîrtaşî aşkere kerd ke dûştê tehdîdan helbet ganî şar  zî tedbîranê xo bigîro û va, ma winî tersonek nîye ke peyser de gam bierzê. 

Şansê polîtîkaya nîjadperwer çinyo 

Demîrtaşî da zonayen ke çiyê ke zerreyê welatî de qewimyenê, helbet bi teber ra eleqedar ê û wina dewam kerd: “Çiye ke Rojawayê Kurdistanî de qewimyenê AKP tersnenê. AKP îrade û statuyeke ewjayî xo rê zey tehdîd û taloke vînena. Eke nika Rojawa de Îsraîl amebiya ronayene, do Erdoganî dûştê nayî de veng nêvetiba. Eke îmkan bibîya, iyê dê ewro temamîya Başûrê Kurdistan îşgal kerdiba, Parlementoya Hewlêrê welişnaba û alaya tirk biantiba. La ti şansê na polîtîkaya har, nîjadperwer, netewperwer û mezhebî çinya. Ne Mûsil de, ne Kerkûk de, ne zî  Rojawa de şansê nayî çinyo.”

Dormeyê maseyekê de bibê yew 

Hemserokê HDP Demîrtaşî  qala zîyaretê xo yê Başûrê Kurdistan zî kerd û da zonayen ke pêdiyayişan de înan aşkere kerdo ke ganî kurdî meseleyanê xo, mîyanê xo de, rî bi rî çare bikerê. Demîrtaşî fina veng da partîyanê Başûrê Kurdistan ke wextekê kilm de bîrê têhet, dormeyê maseyekê de bibê yew û va, ya muhîm israra yewitîya kurdan e.  Demîrtaşî ard zon ke hengameya ke Kerkûk, Mûsil û Rojawa de qewimyena, ganî xîzmetê çapemenî, sîyaset û netewîya kurd bikero.   


DÎHA / AMED