Gerîlayan serrgêra 29. ya Qirkerdişê Helebçe de kesê ke merdî yad kerdî û veng dayî heme şaranê Kurdistanî ke wa vera qirkerdişan de yewîya neteweyî awan bikerî û vera îxanetkaran de têkoşîn bidî.
Ewro serrgêra 29. ya serrgêra Qirkerdişê Helebçe ya. Her çiqas ke 29 serrî Qirkerdişê Helebçe ser ro derbaz bîyî hema zî birînê qirkerdişî teze yî. Gerîlayan Qirkerdişê Helebçe ser o qisey kerdî.
Gerîlayê HPGyî Helgurt Merîwanî va ‘Hêzê ke Kurdistan de dagîrkerî kenî xeylê qirkerdişê girdî kurdan ser de viraştî û nînan ra yewe zî Helebçe yo’ û qiseykerdişê xo wina domna: “Na tabloya şermî bi fermanê 74. ke vera şarê êzidî de dewam keno. Dewleta tirk çeteyanê PDKyî perwerde keno û erşaweno Şengalî ser de û no zî parçeyê planê rijnayîşî yo. Çeteyanê TC û PDKyî hêrişê Şengalî kerd û no zî hêrişanê îxanetî ra yew o. Sey hêrişê ke tarîxê Kurdistanî de bîyî, nê hêrişî zî nînî qebulkerdiş. Ganî vera çeteyanê PDK û AKPyî de yewîya neteweyî bêra xurtkerdiş. Dişmen wazeno ke cografyaya kurdan de plananê rijnayîşî bierzo dewre. Cok ra ganî şarê ma hişyar bibo.”
Ganî bibo sembol
Merîvanî dewamê qiseykerdişê xo de va ‘ganî Helebçe Kurdistan de bibo bajarêko sembol’ û qiseykerdişê xo rê wina dewam kerd: “Kurdî seba girewtişê heqanê xo wayîrê heme şert û mercan î. Ewro embazêko ma yê helebçeyij şono Kobanê de şer keno û şehîd keweno. Embazêko ma yê dêrsimij şono Başûrê Kurdistanî de şer keno û şehîd keweno. Êdî parçebîyayîş wedarîyeno. Ganî şarê ke Kurdistan de cuyenî bi hawayo gird bifikiryî. Badê ke Mesut Barzanîyî dewleta tirk reyde pêvînayîş kerd, çeteyanê PDKyî hêrişê Şengalî kerdî. Vera nê hêrişan de ganî ma bi hawayêko hîna xurt wayîrê yewîya neteweyî bivejyî. Hêrişê çeteyanê PDKyî nîşanê ma dano ke hêzê dagîrkerî wazenî xeta hemkarî yê kurdan mîyanê kurdan de bidî domnayîş. Tarîxê Kurdistanî îxanetê PDKyî tim nuseno. PDK tim vera yewîya neteweyî de vindeno û yê ke vera yewîya kurdan de bo, dişmenê kurdan o.”
Bi destê hinan bî
Gerîlayê HPGyî Cudî Mizurî zî hayr ant yewîya neteweyî ser û wina domna: “Ganî heta ke birînê neweyî nêabî, ma tedbîran bigirî. No zî ancax bi yewîye mumkin o. Ma bi no hawa eşkenî hesabê qirkerdişî bipersî. Dişmenê kurdan tim firsendê hêrişê kurdan gêrenî û ganî ma nêyî bizanî. Ganî ciwanê Başûrê Kurdistanî bi hawayo aktîf mîyanê têkoşînê rizgarîya neteweyî de ca bigirî. Ciwan hêzo tewr dînamîk o û zaf aktîf o. Eke ciwanê kurdan yewîya xo awan bikerî, ti hêz nêşêno vernîya ci de bivindero. Ganî ciwanî vera xeta îxanetî yê PDKyî de xo rêxistine bikerî. Ez veng dana heme ciwananê Kurdistanî ke wa beşdarê gerîla bibî û rolê xo kay bikerî. Kam ke hêrişê neteweyîya kurdan bikero, do bedelê ci bi hawayo giran bido.”
ÛMÛT DENÎZ / ANF / BEHDÎNAN