Hemserekê Konseyê Caardişî yê KCKyî Cemîl Bayikî xoverdayoxanê Rojawanî ke vera artêşa Tirk û çeteyanê ci de xoverdayîşêko tarîxî nîşan danî silam kerd. Bayikî bale ante îradeya xoverdayoxan ser û wina va: “Wa nê xoverdayoxî bizanê ke Kurdî û heme merdimê biwijdanî piştî danê înan. Coka ê çend bedelanê girdan bidê û dejanê pîlan biancê zî tewr peynî do ser bikewê.”
9ê Teşrîna verêne ra nata yo ke artêşa Tirk û çeteyê ci hêrişê Vakur û Rojhelatê Sûrîye keno û bi tanq, top û teyarayan sivîlan hedef gêno. Heta nika bi seyan sivîlî ameyî qetilkerdene û hendêna zî birîndar bîyî.
Vera hêrişanê dagîrkerîye de xoverdayîşê şarê Vakur û Rojhelatê Sûrîye zî bi hawayo xurt dewam keno û xeylê derbê girdî dîyayî artêşa Tirk û çeteyanê ci ro. Artêşa Tirkî ke nêşêna xoverdayîşê şarî derbaz bikera, sîlehanê kîmyewîyan bikar ana.
Çend rojî verê mabênê Amerîka û dewleta Tirkî de pêvînayîşêk amebî viraştene û qerarê adirbirnayîşî amebî girewtene. Herçiqas ke hetê Kurdan goreyê qerarî hereket keno zî artêşa Tirk û çeteyê ci hêrişê xo yê dagîrkerî domnenî. Hemserekê Konseyê Caardişî yê KCKyî Cemîl Bayikî babete ser o qisey kerd û bale ante polîtîkaya dagîrkere ya dewleta Tirkî ser. Bayikî dîyar kerd ke ganî şarê Rojawanî vera hêrişan de xover bido û erdê xo canêverdo.
Dewleta Tirkî nêşêna na îrade bişikna
Bayikî qiseykerdişê xo de xoverdayoxanê Rojawanî silam kerd û wina va: “Şervanê QSD, YPG/YPJyî û şarê Vakur û Rojhelatê Sûrîye xoverdayîşêko tarîxî danê. Wa nê xoverdayoxî bizanê ke Kurdî û heme merdimê biwijdanî piştî danê înan. Coka ê çend bedelanê girdan bidê û dejanê pîlan biancê zî tewr peynî do ser bikewê. Çew nêeşkeno vera nê şerî de vindero. Dewleta Tirk çiqas sîleh û teknîkî bişuxulna zî nêeşkena na îrade bişikna.”
Peynî de do Kurdî ser bikewê
Bayikî da zanayene ke Kurdî şerê estbîyayîş û çînbîyayîşî danê û wina va: “Kurdî kura de benê wa bibê deweleta Tirkî seba çinkerdişê înan hêriş kena. Kurdî seba ke çin mebê, seba nasname, herre, kultur û azadîya xo çîyo ke dest ra yeno, ganî bikerê. Kurdan dinya belayêka gird ra xelisnaye. Ganî herkes naye bivîno û goreyê naye têbigêro. Bêxera xoverdayîşî yewna çareyê Kurdan çin o. Eke Kurdî pêro pîya bibî yewe û biîrade û qerardarîye rayra şirê, kes nêeşkeno îradeya înan bişikno. Beno ke dejanê girdan biancê la do qezencê ci zî gird bo. Kurdî zanê ke Tirkîya wazena Kurdan çin bikero. Nê semedî ra wayîrê xoverdayîşê Rojawanî vejîyenê. Xoverdayîşê rûmetinî rê wayîrvejîyayîş xo rê wayîrvejîyayîş o. Coka Kurdî bedelan gênê çim. Peynî de do Kurdî ser bikewê.”
BEHDÎNAN