Kongreya Komelê Demokratîke ya Kurdistanî ya Ewropa (KCDK-E) îzehetêko nuştekî daye û seba beşdarbîyayîşê Festîvala Mazlum Doganî ke her serre bi hawayo sîstematîk yena viraştene, veng daye. KCDK-Eye dîyar kerda ke wa herkes bi şîyarê ‘Sere Wedarne’ xoverdayîşê xo bivejo dûşto tewr berz û beşdarê festîvala ke hetê Ciwananê Azadan ra yena organîze kerdene, bibo.
KCDK-Eye îzehetê xo de vato ‘polîtîkaya xo ya dişmenîya kurdan Vakur, Rojawan û Başûrê Kurdistanî de hîna zêde kerdî’ û wina domnayo: “Tecrîdo ke Rayber Apoyî ser o esto, ameyo kûr kerdene. Hêrişê heme qezencanê kurdan yeno kerdene. Dewleta tirkî ke nêşêna vera kurd û têkoşînê azadîye de netîce bigîro, hewl dana bi konseptê şerî netîce bigîra.”
KCDK-Eye dewamê îzehetê xo de wina vato: “Ganî ma nê polîtîkayanê dewlete bi xoverdayîşêko topyekun veng bivejî. Lazim o ma no proseso tarîxî de rêxistine û yewîya xo vejî dûşto tewr berz û têkoşînê xo zêde bikerî. Donemêko winasî de Festîvala Mazlum Doganî ya 21. do 14ê Temmuze de bêro viraştene. No proses beşdarbîyayîş û xoverdayîşêko ortax roneno vernîya ma. Senî ke Mazlum Doganî vera tarîtîya faşîzmê 12ê Êlule de bi hawayo destanî têkoşîn da, ganî ma zî bi beşdarbîyayîşê na festîvale, têkoşînê xo berz bikerî. Ma veng danî heme meclîs û xebatkaranê xo ke wa beşdarê festîvale bibî.”
ANF / BRUKSEL