Çalakîyê ke seba weşî, ewleyî û azadîya Rayberê Şarê Kurdî yenî viraştiş ra yewe zî bajarê Strasbourgî yê Fransa de vernîya dezgehê CPT û Konseyê Ewropa de virazîyena ya.
Seke yeno zanayîş na çalakîye nizdîyê 1 aşme yo ke dewam keno. Bi desan dezgeh û roşnvîrî destek danî çalakîye û na çalakîye her roje hetê kes û komeleyanê cîya-cîyayan ra yena zîyaretkerdiş. Heta nika pêvînayîşê ke CPT û Konseyê Ewropa reyde ameyî kerdiş de cewabê ke ameyî waştiş, nêameyî girewtiş. Yeno zanayîş ke KCDK-E û TJK-Eyî verê cû îzehet daybî û vatbî ‘heta ke netîce bêro girewtiş, çalakîye do dewam bikera’.
Babete ser o Dîvanê Hemserekîya KCDK-Eye îzehetêk da. KCDK-Eye îzehetê xo de dîyar kerde ke eleqeyo ke seba çalakîye yeno nîşandayîş, îqtîdarê AKP û MHPyî eciz kerdo û wina va: “Çapemenîya şero taybet xeberanê provokatîf û hêrişkaran virazena. Heto bîn ra zî ê wazenî ser Konseyê Ewropa û dezgehanê bînan ser o tayê zextan bikerî û çalakîyan asteng bikerî.”
Heta netîce bêro girewtiş do dewam bikero
KCDK-Eye îzehetê xo de wina vato: “Heta ke netîce bêro girewtiş do çalakîye dewam bikera. Ma veng danî roşnvîr, rojnameger, dezgehanê dost û akademîsyenan ke wa beşdarê çalakîya ma bibî. Ganî ma çalakîya xo hîna hîra bikerî ke wa Konseyê Ewropa û CPT qebul bikerî. Cok ra ma veng danî herkesî ke wa beşdarê mîtîngê ke do 21 û 22ê teşrîna peyêne bibî û wayîrê Rayber Apoyî bivejyî. Ewro qaydeyê welatperwer, demokrat, sosyalîst û azadîye wayîrê Rayberê Şarê Kurd Ocalanî vejîyayîş o. Ganî ma vera dîktator Erdoganî de bivejyî û wayîrê paradîgmaya Rayberîye bivejyî. Ganî herkes manaya na çalakîye baş bizano. Ma veng danî herkesî ke wa destek bidî nê mîtîngan.”
ANF/ STRASBOURG