Hemserekê Şaredarîya Bajarê Girdî ya Amedî Ahmet Turk zî çarçeweya konseptê OHALî de amebî tepiştiş û nika Hepisxaneyê Sîlîvrî de yeno vindarnayîş.
Avûkat Erdal Kuzuyî Hepisxaneyê Sîlîvrî de Ahmet Tirk zîyaret kerd. Pêvînayîşî ra dima Kuzuyî îzehetêk da û qala mesajê Ahmet Turkî kerd. Kuzuyî ard ziwan ke Ahmet Turk wina vato: “Vera faşîzmî de awankerdişê cepheyêko pêrabeste şert o. Ganî ma cepheyêko pêrabeste awan bikerî.”
Îşkence yeno kerdiş
Ame musayîş ke rewşa weşîye ya Ahmet Turkî nêbaş o, wextê muayene de seba ke kelepçeyê Turkî nêameyo akerdiş, Ahmet Turkî zî tedawî red kerdo. Turkî seba muayeneyo bi kelepçe vato ‘bêrûmetî yo’.
Ahmet Turk derheqê weşîya xo de bi mabênkarîya Oya Oznure mektûbek erşawit. Mektûba Turkî de wina yeno nuştiş: “Peymitişê pîlê zerrîye ame kerdiş û tehlîlê gonî û îdrarî ame viraştiş. Labelê netîceyê înan nêdîya mi. Do raporêk amade bikerî. Ez şîya doktorê çiman û muayene bîya. Doktorî mi ra va ‘seba ke katarakt çimanê to de esto, ganî ti amelîyat bibî.’ Her di çimê mi awin benî. Nînan ra zêde ez neheqîyan ver gerre kena.
Tepiştişê bêhuqûqî yenî kerdiş û ser de zî îşkence yeno kerdiş. Tecrît bi xo îşkence yo. Seba ke problemê weşîya mi esto, ma 2 kesî tê reyde manenî. Labelê embazê bînî tena manenî. Çîyê ke yenî cuyayîş, tena tecrîdî reyde eleqeder nîyî. Wazenî şorişger, demokrat, kurd û muxalîfan biqedênî û rayîrê dîktatorîya xo biakerî. Şarê Tirkîya do ameyoxe de muhakemeya nê zulmî bikero. Ganî ma vera faşîzmî de cepheyêko demokratîk awan bikerî.”
ANF / BRUKSEL