Çalakîya grevê vêşanî ya Nurîye Gulmene û Semîh Ozakçayê ke seba agêrayîşê karê xo, daybî destpêkerdiş, roja 204. de dewam kena. Seke yeno zanayîş 2 rojî verê Nurîye bi hawayo zorî neqlê beşa lezgîne ya nêweşxaneyî bîybî.
Babete ser o cinîya Semîh Ozakçayî mamosta Esra Ozakçaya ke 129 rojî yo ke grevê vêşanî de ya û vizêr Semîhî reyde pêvînayîş kerda, qisey kerde.
Mamosta Esra Ozakçaye va ‘Seba ke çalakgeran nîyarî mehkeme, bi hawayo remnayîş berdî nêweşxane’ û wina dewam kerde: “Wazenî wexto ke firsend bivînî mudaxale bikerî. Bifikiryênê, Nurîye wexto ke kitab wendêne û ser hişê xo de bîye, ameye remnayîş. Nurîye û Semîh ewil karê xo ra erzîyayî, heqê înan yê xebetîyayîşî, dima ra avûkatê înan ameyî tepiştiş û bi no hawa heqê înan yê pawitişî û tewr peynî zî nêberdî mehkeme û heqê înan yê mehkemebîyayîşî destê înan ra ame girewtiş. Ma cuya Nurîye ra etirîyenî. Eke mudaxaleyêk bêro kerdiş, beno ke Nurîye bimira. Ma nêyî ra zaf tersenî. Çimkî no welat de awe daxî nêdîyaye çalakgeran û bi no hawa pawe de mendî ke ser hişê xo ra şêrî. Bawerîya ma înan rê çin a. Ganî Nurîye nêweşxane ra bêra vetiş û bîyarî mehkeme.”
Semîh 33 kîlo ra zêdeyêr vînî kerd
Esra Ozakçaye dewamê qiseykerdişê xo de va ‘Semîh 33 kîlo ra zafêr vînî kerdo’ û wina domnaye: “Nurîye û Semîh heta nika qet fek waştişê karê xo ra veranêdayî. Ewro çîyo ke yeno mehkemekerdiş, waştişê karê înan o. Çimkî îqtîdar wazeno, vajo ‘ma şima tewqîf kerd, eşt zîndan û bi zorî mudaxaleyê şima kerd, ma xoradayîşê tîşortanê şima qedexe kerd, ma kesê ke pişt dayî şima, tewqîf kerd labelê şima eynî çîyî domnenî. Nika Nurîye û Semîh mehkeme ra yenî remnayîş. Labelê wexto ke remnenî, vanî ‘beno ke biremî’. Hem bi hezaran polîsan anî mehkeme ver û hem zî vanî hêzê ewleyîye kemî yî. Nurîye û Semîh seba qelebalixo ke 14ê êlule de mehkeme ver de kom bîyî rê zaf kêfweş bîyî û wazenî ewro zî wina wayîr bêro vejîyayîş.”
Esra Ozakçaye va ‘ewro mehkemeya Nurîye û Semîhî esta’ û wina qedênaye: “Na doze tena ya ma nîya. Na doza bi mîlyonan kesan a. Na doza gêrayîşê heqî ya. Gêrayîşê heqî, xoverdayîş suc nîyo. Karê xo waştiş suc nîyo. Ma wazenî bibî şahidê laşê înan yo helîyaye. Bêrê ma Sîncan de wayîrê doze bivejyî.”
JINNEWS/ANQARA
Çalakîya Yukselî dewam kerde
Heto bîn ra çalakîya ke seba piştîdayîşê çalakîya Gulmene û Ozakçayî Caddeyê Yukselî de yena viraştiş, roja 324. de dewam kerde. Çalakgerî sey her hewte waştî ke Caddeyê Yukselî de vernîya Abîdeya Heqê Merdiman de îzhetêk bidî çapemenîye. Seba nêyî Ziqaqê Konurî de ameyî têhet û waştî ver bi Yukselî bimeşyî. Labelê polîsan destûr nêda. Çalakgeran pankart akerd, labelê pankart hetê polîsan ra ame dirnayîş û polîsan mudaxale kerd. Çalakgeran va ‘rojêkî şima zî do kar ra bêrî eştiş û o wext ti kes wayîrê şima nêvejîyo’ û reaksîyon nîşanê polîsan da. Çalakgeran slogananê ‘Ma kedkar î, heqdar î, ma do qezenç bikerî’ û ‘Nurîye û Semîh tena nîyî’ eştî û bi no hawa çalakîya xo qedênayî.”