Parlamenterê HDPyî yê Mûşî Ahmet Yildirim Berlîn de beşdarê kombîyayîşêkî bi û ewja de veng da weçînitoxanê Ewropaye. Yildirimî weçînitoxan hişyar kerd û wina va: “Ma do vera 2 îttîfaqanê kanperestan de têkoşîn bidî. Cok ra no weçînayîş de tena wezîfeyê ma ray dayene nîyo. Ganî ma keso ke heta nika silam nêdayo ci zî îkna bikerî. ”Hetê Merkezê Komelê Demokratîke yê Kurdê Almanya (NAV-DEM) û Meclîsê Cinîyan yê DEST DANî ra bajarê Berlînî yê Almanya de derheqê weçînayîşê 24ê Hezîrane de kombîyayîşêkê şarî ame organîzekerdiş. Kombîyayîş moderatorîya Hemsereka HDPyî ya Berlînî Mehtap Erole de ame viraştiş û Parlamenterê HDPyî yê Mûşî Ahmet Yildirim, Parlamenterê Eyaletê Berlînî yê Partîya Çepî Hakan Taş û Hemserekê Şaredarîya DBPyî yê Gimgimî Huseyîn Guneş û xeylê kesî beşdarê kombîyayîşî bîyî. Yildirimî dest bi qiseykerdişî kerd û wina va: “10 serrê vernîya ma de do Rojhelato Mîyanên de rejîm, sînor û statuyî bibedilyî. Herême de bê kurdan îstîkrarêk awan nêbeno. Beno ke nika 59 parlamenter û 100 şaredar biasî, labelê serkewtişê partîya ma de keda bi sehezaran merdiman esta. Ma do no het de israrê xo bidomnî.” Ganî şima herkesî îkna bikerî Yildirimî dewamê qiseykerdişê xo de wina va: “Tevgerê ke bawerîya xo bi aştî û azadî anî, beno ke raştê hêrişê zaliman bêrî. Ma seba ke raştê hêrişî ameyî, bin nêkewenî. Partîyêka sîyasî seba ke derbe werde, bin nêkewena. Kamcîn wext bin keweno? Wexto ke doza xo ra fek verado, bin keweno. Ma do 24ê Hezîrane de vera 2 îttîfaqanê kanperestan de têkoşîn bidî. Îttîfaqêkî de AKP-MHP-BBP, yê bînî de zî CHP-Partîya ÎYÎ-Saadet-Partîya Demokratî estî. Xebatê Ewropa zaf muhîm î. Goreyê Tirkîya tîya de zextî hîna kêmî yî. No weçînayîş de tena wezîfeyê şima ray dayene nîyo. Şima do kesê ke heta nika qet silam nêdayo înan daxî îkna bikerî.” Hakan Taşî zî va ‘partîya ke nasname, kultur û fikrê cîyayî tede ameyî têhet HDP ya’ û wina domna: “Partîya ke ampûlê aye teqayo, êdî nêşêna Tirkîya roşin bikera. Seba Tirkîya û Kurdistanêko roşin ganî ma 24ê Hezîrane de weçînayîşî qezenç bikerî.” Kurdî qet sere nêronenî Huseyîn Guneşî zî wina va: “Seba aştî, demokrasî û azadîye ganî herkes wayîrê HDPyî bivejîyo. 7ê Hezîrane ra dima vera HDPyî de hêrişê topyekunî dest pêkerdî. Bitaybetî qayûman reyde hewl dayî AKPyî bihêz bikerî. Nêyî şaredarî û qezencanê şarî xesp kerdî. Tena nînan reyde zî nêmendî nameyê dezge, park û ziqaqanê ma bedilnayî. Herinda merkezê ma yê kulturî de salona sporî viraştî. Ma bitaybetî nînan Gimgim de dî. Amancê înan o bi ke AKP rê ray bidî qezençkerdiş. Labelê kurdî tarîx ra nata qet sere nêronayî û hertim sere wedarnayî. Ma zî sey domanê nê şarî, heta nika sere nêronayo û ma do sere nêronî zî.” ANF/BERLÎN