16ê nîsane de do Tirkîya de referandûmêk bêro viraştiş û hukmat bi nê referandûmî Sîstemê Serekî ano verê şarî û hewl dano dîktatorîyêka kesêk awan bikero. Nê semedî ra hukmatî heme çî girewto xo çim. Bi nizdîbîyayîşê referandûmî HDPyo ke sere de kurd û tevgerê kurdan û heme muxalîfan mîyanê xo de hewêneno ser de zext û tedayî zî zêde bîyî. Tewqîfbîyayîşê parlamenteranê HDPyî, betalbîyayîşê parlamenterîya înan û hêrişê ke Nisêbîn de benî, nîşaneyê nê yî. Babete ser o Wezîro kehen û sîyasetmedar Zîya Halîsî qisey kerde û vînayîşê xo ard ziwan.
Halîsî va ‘hetê demokrasî û azadî de Tirkîya kewena wextêko tarî’ û qiseykerdişê xo wina domna: “No proses de qanûn û qanûno bingeyî yenî îxlalkerdiş. Dadgeh bi temamî kewtî bin kontrolê îqtîdarî û sey dezgehêko girêdayeyê ci xebetîyeno. Cok ra hetê ke muxalefet î yenî mexdurkerdiş. Labelê mexdurîyeto tewr gird Tevgerê Kurd û HDPyî ser o yeno meşnayîş.”
Amadekarîyî estî
Halîsî dewamê qiseykerdişê xo de va ‘nê operasyonê ke vera HDP û Tevgerê Kurdan de yenî kerdiş, sey amadekarîya padîyayîşê partîya HDPyî asenî’ û qiseykerdişê xo wina da domnayîş: “Nika wazenî kurdan bipelçiqnî û polîtîkayanê xo na çarçewa de meşnenî. No seba aştî û demokrasîya komelkî tehlukeyin o. Prosesêko winasî de do referandûm bêro viraştiş. Ma bi rewşêka kaotîk reyde rî bi rî yî. Ez bawer kena ke do referandûm de hukmat hişyarîyêk bigiro û xo bianco sînoranê xo.”
Ganî îtîrazêko qewetin bibo
Halîsî qiseykerdişê xo de bale ant netîceyê referandûmî ser û wina va: “Ganî komel qederê xo teslîmê nê hukmatî nêkero. Demanê verênan de zî kurd û HDPyî ser de zext û tedayî xeylê reyan ameybî viraştiş, labelê netîce nêgirewtbî. Kurdî wazenî ke bi ziwanê xo de perwerde bivînî; no waştiş waştişêko heqdar o. Beno ke ewro nê polîtîkayî netîce gênî, labelê eke merdim goreyê demêko derg bifikirîyo, netîce nêgênî. Cok ra ganî îtîrazêko bihêz bibo.”
DÎHABER/ENQERA