VÎYAN ARTOS/ANF/BEHDÎNAN
Komîteya Perwerdeyî ya PAJKî ra Rojda Sêrte wina va: “AKP hêrişê bajaranê kurdan kena. Ganî ma zî vera yê ke dest nanî bajaranê ma de sere wedarnî”
Komîteya Perwerdeyî ya PAJKî ra Rojda Sêrte derheqê polîtîka û nizdîbîyayîşê hukmatê AKPyî de qisey kerde û vînayîşê xo arde ziwan. Sêrte bitaybetî bale ante hêrişanê AKPyî ser û hişyarîyê muhîmî kerdî. Sêrte va ‘împaratorîyê ke hêrişê komelan kenî, huner, eserê û cayanê tarîxî yê ê komelî rê zî hêriş kenî’ û wina dewam kerde: “Hêrişê sifteyînî wextê Sumeran de dest pêkerdî, dima ra bi hêrişanê Akadan yê vera Kurdistan û Zagrosan de dewam kerdî, dima ra zî hêrişê vera Palmîra û Troya heta roja ma ya ewroyî ameyî. Tarîx ra nata tim xoverdayîşî bîyî, çîyê ke benî sebebê xoverdayîşî, çimeyê xo tarîx ra gênî.
Tersê xoverdayîşî
Sêrte dewamê qiseykerdişê xo de ‘AKP ananeyê xoverdayîşî yê şarî ra terseno, cok ra hêrişê cayanê tarîxîyan û vîrê komelî keno’ û wina domnaye: “Mumkin nîyo ke AKP xoverdayîşê şarî bişikno û şarî bigîro binê zaptrupatî. Nê semedî ra AKP hewl dano erdo ke şar ser de cuyeno, dagîr bikero û ê erdî ser de hakimîya xo awan bikero. AKP heme raybazanê kapîtalîzmî xebetneno û hewl dano mekananê şarî goreyê fikrê netewe dewlete newe ra awan bikero. Nêyî zî seba ke bişînbo komelî bi hawayo baş kontrol bikero, dagîr bikero û hakimîya xo awan bikero, keno. O wext problemê winasî yê AKPyî estî û AKP hîna îqtîdarê xo heme cayan de ser nêvisto. Xora seba ke nêkerdo, keweno zehmetî. Cok ra bi TOKÎ hewl dano vîrê şarî pak bikero, bajaran bajarbîyayîş ra vejo. Projeyê AKPyî hewl dano têkilîyanê komunalan orte ra wedarno.”
Ganî qebul nêkerî
Sêrte qala berpirsîyarîyanê cinîyan kerde û wina va: “Ganî projeyanê bajaran de ma cinîyî ca bigîrî. Her çiqas ke dewlete hewl dana xira bikera zî nê bajarî raştîya ma yî. Ganî heme cinîyî bajarê ke ameyî rijnayîş de bêrî têhet û bi hawayo ortax hereket bikerî. Çimkî kulturê xoverdayîşî hîna dewam keno. Nê cinîyî û cinîyê ke dewe û bajarê înan nêameyî rijnayîş ganî her di zî pîya hereket bikerî. Na berpirsîyarî, berpirsîyarîya komelî ra yena. Tarîx û wijdan nêyî ma ser de danî ferzkerdiş.“
Tarîx estena ma ya
Endama Komîteya Perwerdeyî ya PAJKî Rojda Sêrte va ‘Tarîx estena ma ya’ û qiseyanê xo bi nê vatenan qedêna: “Bajarê ma ma yî, ma zî bajarê ma yî. Ganî ma wina mîyanê yewbînan de bibî. Eke ma nêwazenî bi kulturê tecawizî pîl bibî, o wext ganî wijdanê ma sere wedarnî. Tarîx estena ma ya, eke dagîrkerêk bêro dest bierzo estena ma, ganî ma sere wedarnî. Eke sere nêro wedarnayîş, o wext ganî ma rûmet û şerefê xo newe ra çiman ra derbaz bikerî.”