Weçînayîşê 24ê Hezîrane rê tena aşmêk mend û labelê no wext Ewropa de hîna tay o. Almanya de do 7ê Hezîrane de raydayîş dest pêbikero û do heta 19ê Hezîrane roja îne dewam bikero. Na çarçewa de hem zereyê welatî û hem zî teberê welatî de lez dîyayo xebatan.
Babete ser o elewîyî qisey kerdî û vînayîşê xo aşkere kerdî. Îdarekarê Komeleya Vera Qirkerdişê 38î de ya ya Dêrsimî Huseyîn Yamaçî va ‘weçînayîşî armanc nîyî, halet î’ û wina domna: “Ganî ma goş nêdî rew virazîyayîşê weçînayîşî û xebatan bikerî.”
Pîr Duzgun Ozatayî va ‘weçînayîş sere de seba elewîyan û seba heme bindestan şanso peyên o’ û wina dewam kerd: “Yezîd ameyo heta berî ver û wazeno ganê herkesî bigîro. Ganî ma zî vera Yezîdî de bivinderî. Seba nêyî zî ganî HDP bendê weçînayîşî derbaz bikero. Seba ke HDP temsîlkarê elewî, sunî, êzidî û yê bînan o, ganî bendî derbaz bikero.”
Elewîyî ray nêdanî nînan
Moro Nazlierî zî cepheyê miletî rexne kerd û wina va. “Akşenere cînayetê ke kerdoxê înan dîyar nîyî, kerdî. Karamollaoglu xora Qetlîyamê Sêwazî ra yeno zanayîş. Elewîyî do ray nêdî nînan. Ti cayê dinya de çîyêko winasî çin o. Verê ti do qetil bikerî û dima ra ti do rayan biwazî.”
Alî Mahîr Abdîkî zî bale ant hêrişê ke vera HDPyî de bîyî ser û wina va: “7ê Hezîrane ra dima HDP raştê hêrişanê tewir bi tewiran ame. HDP raştê hêrişanê faşîzmî ame. Sîyasetmedarî ameyî tewqîfkerdiş û qayûm tayînê şaredarîyan bîyî. Ganî heme şar, hêzê demokrasî û yê ke xo ra vano ‘ez merdim a’ ganî hetê HDPyî de ca bigîro. Bîyayîşê îqtîdar yê HDPyî zaf muhîm o.”
Planê îqtîdarî serûbin bîyî
Rojnameger Adîl Yîgîtî zî qala muhîmîya namzed bîyayîşê Muharrem Înceyî kerd û wina va: “Heto bîn ra Demîrtaşo ke temsîlkarê 6 mîlyon merdiman o, tewqîfkerde yo û no zî seba demokrasîya Tirkîya şerm o. Ê hesab kerdêne ke bi weçînayîşê verwextî HDP do binê bendê weçînayîşî de bimano û partîya ÎYÎ zî do nêşênbo bikewo weçînayîşan. Labelê CHP ra derbazbîyayîşê parlamenteran, planê înan serûbin kerd. Mehmet Cabayî zî ard ziwan eke elewîyî baş konsantre bibî, do ameyeyê elewîyan baş bibo.
24ê Hezîrane seba bindestan zaf muhîm o
Ayfer Bere va ‘Teşebusê derbe yê 15ê Temmuze ra dima heme dezgeyî ameyî padayîş’ û wina domnaye: “Goreyê mi weçînayîşê 24ê Hezîrane zî îlegal î. Wa herkes weçînayîşan de hetê HDPyî de ca bigîrî. Bi deshezaran merdimî tewqîfkerde yî. Cok ra ganî ma zaf bixebetyî. Wexto ke ma şêrî sindoqan ser, ganî ma Cizîr, Sûr, Dêrsim û Gurgumî xo vîra nêkerî. 24ê Hezîrane seba bindestan zaf muhîm o.”
PÎRHA/STENBOL