Dayîkanê Dolbentsipîyan ê Êlih û Stenbolî derheqê hêrişê vera Başûrî de benî û tayînbîyayîşê qayûman de dîyar kerd ke na dewlete rikin û înkarker a û da zanayene ke ganî ê ke xo ra vanî ‘ez merdim a’ ganî vera nê zulmî de bivinderî û goş bidî mesajê Birêz Ocalanî.

Rayberê Şarê Kurdî Abdullah Ocalanî 7ê Tebaxe de avûkatanê xo de pêvînayîşêk kerdbî û ê pêvînayîşî de veng dabi ‘aqlê dewlete’ û mesajê ‘ez eşkena hewteyêk de çareser bikera’ dabi. Mesajê Ocalanî ra dima hemserekê şaredarîyanê Amed, Wan û Mêrdînî karî ra amebî girewtene û herinda înan de qayûmî tayîn bîbî.

Reyna vera Başûrê Kurdîstanî de bi nameyê ‘Operasyonê Pençe 3’ de hêrişî dîyabî destpêkerdene. Dayîkanê Dolbentesipîyan ê Êlih û Stenbolî ke seba wedarnîyayîşê tecrîdê serê Ocalanî ziqaqan de bî, Ajansê Mezopotamya ra Bariş Ceyhan û Metîn Yoksû rê qisey kerd û vera qewimîyayîşan de reaksîyon nîşan da.

Dayîkan ra Emîne Erbeye dîyar kerde ke qayûm û hêrişê ke vera Başûrê Kurdîstanî de dîyayî destpêkerdene nîşan danî ke dewlete şer de israr kena. Erbeye wina dewam kerde: “Ti merdim û domanê Erdoganî leşkerî nêkeno. Coka hende şer de israr keno. Na dewlete rikin û înkarker a, cok ra aştîye nêwazena. Eke aştîye mumkin bo, ti manaya şerkerdişî çin a. Wa şêrî dayîkanê leşker û polîsê ke şer de mirenî ra bipersî, gelo welato ke domanê înan tede çin î, se kenî? Ganî goş bidî vengdayîşanê aştîye yê Ocalanî.”

Fek dişmenîye ra verabidê

Dayîka Aştîye Bedîa Gokkuze zî wina va: “Ma mîyanê polîtîkayanê şerî yê lêminan de yî. Birêz Abdullah Ocalan seba aştîye û muzakereyan veng dano. Ez tîya ra veng dana dayîkan. Domanê şima çira ê koyan de mirenî? Wa vernîya nê şerî bigîrî. Eke domanê ma mirenî, ez welatî se kena? Wa fek na dişmenîye ra verabidî.” Dayîkan ra Guler Bugdaye zî va ‘ma hende gonîye bes nîya’ û wina domnaye: “Çira şima mirdî nêbenî? Ewro hetan ra yew çiqas raştê neheqîyan yeno, labelê reyna zî vano aştîye û ganî herkes muhîmî bido ci. Ma bi serran o ke vanî aştîye û ma do nika ra pey zî vajî aştîye.”

Hemserekîye vengê cinîyan a

Dayîke Dolbentsipîye Perîhan Bûlûte zî daye zanayene ke ganî heme hetê wayîrê vengdayîşê Ocalanî biveyî û wina va: “Hîna mesajê Ocalanî rojeve de bî, qayûmî tayîn bîyî. Ewro înan sîstemê hemserekîye kerd mehne û qayûm tayîn kerd. Hemserekîye vengê cinîyan a. Cok ra wa cinîyan ra nêtersî.” Dayîkan ra Sûltan Bozkûrte zî wina va: “Tirkîya ancax Kurdan reyde aştîye virazo, ameyoxê aye roşin beno. Gelo nê polîtîkayî heta key dewam bikerî? Kiştiş û kişîyayîş çare nîyo. Şaredarîyê ke qayûm tayîn bîyî, bi bedelanê girdan ameybî girewtene. Senî Kurdan Stenbol da qezençkerdene, ganî ê zî destek bidî Kurdan.”

Ma do qayûman tepîya bierşawî

Waya cinîya hepsî Berîvan Bîtmene Afîfe Bîtmene va ‘qayûm zulm o’ û wina dewam kerde: “Ganî ê ke vano ez merdim a, cayê xo de nêvindero. Gelo ma do heta key bêveng bimanî? Wa kes nêvajo qey qayûmî tena tîya de bimanî. Eke ewro qayûmî tayînê nê cayan bîyî, siba do tayînê Stenbol, Amed û Îzmîrî zî bibî. Ma do qayûman bierşawî cayê ke ameyî.” Dayîka Şukran Seçkîne zî wina va: “Ganî ma vera qayûman de vîsteke daxî nêvinderî. Ê ke vanî ma birayê yewbînan î, kura de yî? Ma do heta peynî hetê parlamenter û şaredaranê xo de bibî. Tîya de dizdîyêk ameya kerdene û dizdî werte de yî. Kurdî huqûq û aştîye wazenî. Ma do vera zulmî de têkoşînê xo bidomnî.

 

ÊLIH / STENBOL