VÎYAN SAÎD /DELÎLE AXÎN / JINNEWS /ŞENGAL


Rayberê Şarê Kurd Abdullah Ocalan 18 serrî ra zêde yo ke binê tecrîdî de yo û bitaybetî nê serranê peyênan de tecrîd hîna giranêr bîyo. Nizdîyê yew aşmî verê ser medyaya komelkî de tayê xeberî derheqê Ocalanî de ameybî parekerdiş û xeberan de vatêne ke Ocalan merdo.

O wext ra nata kurdî Kurdistan, Ewropa û xeylê cayanê dinya de payan ser de yî û seba weşî, ewleyî û azadîya Ocalanî çalakîyan virazenî. Xanesoro ke girêdayeyê Şengalî yo, ewja de derheqê Rayberê Şarê Kurd Ocalanî de sînevîzyonêk ame nawitiş.

Grûbêka cinîyan sînevîzyon temaşe kerdî. Cinîyî temaşekerdişê sînevîzyonî ra dima derheqê tecrîdî de qisey kerdî û vera tecrîdî de reaksîyon nîşan dayî. Cinîyan dîyar kerdî ke azadîya Rayberê Şarê Kurdî, azadîya heme şaran a.


Azadîya Ocalanî azadîya heme şaran a

Cinîyan ra Endama Îdarekara Cinîyanê Ciwanan ya Şengalî Amara Bêrîvane va ‘tecrîdo ke Ocalanî ser o yeno meşnayîş, pelçiqnayîşê heqê merdiman o’ û wina dewam kerde: “Destpêk de ez sey cinîyêka ciwane nê tecrîdî şermizar kena. Wa hêzê emperyalî na raştîye baş bizanî ke ê nêşênî bi no hawa Rayberî û ciwanan yewbînan ra biqerfnî. Her ke ê kewenî hewldayîşanê winasîyan yê lêminan mîyan, o wext hîsê heyfgirewtişî hîna gird benî. Rayberîye seba ke ciwanê kurdî bibî wayîrê îrade, zaf kede û têkoşîn dayo. Lazim o bitaybetî cinîyê ciwanî yê êzidî wayîrê Rayberî bivejyî.”


Rewşa Rayberîye xeta sûre ya

Bêrîvane dewamê qiseykerdişê xo de bale ante ser xoverdayîşê Rayberê Şarê Kurdî yê 19 serrî ke Girawa Îmrali de nîşan dano û wina domnaye: “Destpêkê nê xoverdayîşî ra heta ewro hêzê komplogêrî hertim kewtî mîyanê hewldayîşê derbe dayîşê nê têkoşînî ro. Seba ke Rayberîye hertim seba azadî û demokrasî têkoşîn dayo, bîyo hedefê hêrişanê îqtîdaran. Rewşa Rayberîye seba ciwanan xeta sûre ya û heta ke Rayberîye azade bibo, çalakîyê ma do bidomyî.”

Bêrîvane peynîya qiseykerdişê xo de veng daye heme ciwananê kurdan û wina qedênaye: “Ez veng dana heme cinîyanê ciwanan û bitaybetî zî ez veng dana ciwananê êzidîyan ke wa seba azadîya Rayberîya xo bivejyî. Wayîrvejîyayîşê Rayberîye hêzê cinîya ciwanî yo.”