Ganî no cînayet bêro roşnkerdiş

Wendekarê Unîversîteya Înonu yê Beşa Muzîkî Kemal Kurkuto ke waştêne şêro Newroza Amedî û hetê polîsan ra bi şikê ‘bombeya ganî’ ame qetilkerdiş. Parlamenterê HDPyî hedîseyî ra dima cayê hedîseyî de cigêrayîş kerdî û beşdarê tazîye bîyî. Verfekê HDPyî Osman Baydemîrî derheqê hedîseyî de walî reyde pêvînayîş kerd.

Baydemîrî vist vîrî ke ‘Vîsta ke Kurkut ame qetilkerdiş ra nata ma seba ke hedîse tarî de nêmano û bêro roşnkerdiş, hewl danî’ û wina va: “Seba nêyî ma bi Walî reyde pêvînayîş zî kerd. Hedefê ma o yo ke ma heqîqet vejî orte. Seba ke Kurkut berê protokolî ver de ame qetilkerdiş, wextê înfazî hetê kamerayan ra ame qeydkerdiş. Polîsan şînayêne bi hawayo sax bitepişî labelê gule panîya. Kamî emrê nê qetilkerdişî da? Ganî nêyî heme bivejyî orte.”

Baydemîrî wina dewam kerd: “Tahrîkê ke derheqê Newroze de ameyî kerdiş, eynî wextî de seba ke rewşe normalîze nêba, ameyî kerdiş. Seba ke kaos bivejîyo, o tetîk ame antiş. Eke ma nêyî bivejyî orte, o wext ma eşkenî welat ver bi rasteyî bîşêrî. Cok ra ez veng dana Serekwezîrî; şima bi sehezaran merdiman rasteyan de nêdî. Wina aseno ke şima nê şarî nêşinasnenî. Ganî şima fek nêyî ra verabidî. Gelo şima do nê cînayetî nêvînî? Ez aşkere vana ke yê ke ê tetîkî anto û yê ke hewl danî qetilkerdiş tarî de bimano, eynî yî? Ez veng dana Wezaretê Karê Zereyî zî; wa cînayetê Hrant Dînkî bîyarê vîrê xo. O wext vatbî karê ‘2 kesê hêrsbîyayeyan’ o la dima ra vejîya orte ke xeylê hetî tede ca girewto. Ganî kerdoxî bêrî tewqîfkerdiş û ceza bidîyo înan.”