Bi vengdayîşê KCKyî yê seba Yewîya Neteweyî ya Kurdan, hetê zaf partî û rêxistinan ra îzehetê piştîdayîşî amebî. Awankaranê Enstîtuya Kurdî ya Stenbolî ke bi Qerarnameyê Hukmê Qanûnî (KHK) amebî padayîş, Şefîk Beyazî babete ser o qisey kerd û vînayîşê xo ard ziwan.
Beyazî va, ‘Serranê 1914 û 1918î de rexistinîya tevgerê kurdan estbî, la sey ewro bihêz nêbîye.’ û wina dewam kerd: “Seba ke o wext mîyanê kurdan de yewîyêka xurt çinêbî, waştişê înan zelal nêbî, wayîrê hêzêko gird yê leşkerî nêbî û hetê dîplomatîk de yewîyêka girde mîyanê kurdan de çinêbî, kurdî sernêkewtî. Kurdî goreyê ê wextan nika hetê sîyasî, komelkî, leşkerî û dîplomatîk de hîna qewetin î.”
Ganî menfietan bido kiştêk
Beyazî dewamê qiseykerdişê xo de va ‘ganî prosesêko winasî heme tevgerê Kurdistanî seba qezençkerdişê kurdan bibî yewe’ û va: “Ganî tevgerê Kurdistanî bibî wayîrê hêzê sîyasî û leşkerî. Vengdayîşê KCK muhîm o. Ganî PDK zî menfîetanê xo yê ferdî bido kiştêk û cewabêko bîyaye bido nê vengdayîşî. Reyna yê ke xo ra vano ‘ez kurd a’ ganî seba girewtişê heqê kurdan, pîya hereket bikerî û çîyo ke do zirar bido kurdan ra zî dûrî bivinderî.”
SADÎYE ESER / DÎHABER / STENBOL