Roje çin a ke derheqê dişmenîya dewlete ya kultur û tarîxê kurdan ser o hedîse nêqewimîyo. Tewr peynî domanê bi nameyê Ç.A û D.Kyê ke Caddeyê Cumhurîyetî yê Wanî de bi erbane deyîran vatênê, hetê polîsan ra ameybî tepiştiş û pereyê ke hetê şarî ra dîyaybî domanan, hetê polîsan ra dest ronîyaybî ê pereyan ser de.
Domanî heta serê sibayî nezaret de menbîy û raştê tehdît û heqaretê polîsan ameybîy. Babete ser o domanan qisey kerd û çîyê ke cuyayî, qala înan kerdî.
Domanan ra Ç.Ayî va ‘verê cû zî seba ke ma ziqaq û caddeyan de deyîr vatênê, polîsan vera ma daybî’ û wina dewam kerd: “Aye roje ma reyna deyîr vatênê. Polîsê sîvîlî ameyî û ma tepiştî. Dim ara heqaretê ma kerdî û şekmatêk dayî mi ro.”
Şêrê sewbîna kar bikerî
Domanan ra Ç.Ayî va ‘wexto ke ma deyîre vatênê, ez tersaya ke polîsî reyna ma bitepişî’ û wina dewam kerd: “Wexto ke polîsan ma tepiştî, polê min o şikite şidênayî, cok ra polê mi zaf deja. Dima ra mi eştî nezaret. Heta serê sibayî ma ewja de mendî. Wexto ke polîsan ma verdayî, ma ra vatî ‘Eke şima reyna deyîranê kurdî vajî, ma do ceza bidîy şima û şima bierzî zîndan’. Ma zî zaf tersayî. Polîsan wextê tepiştişî de şekmatêk dayî mi ro. Polîsan ma ra vatî sewbîna karêk bikerî. Eke şima wina nêkerî, şima reyna keyeyê xo nêvînenî. Ma serbest veradayî, labelê erbaneyanê ma nêdayî ma. Wexto ke ez şîya keye, mi pîyê xo ra va, o zî şî erbaneyanê ma girewt.”
Deyîranê kurdî û sîyasî mevajênê
Domanan ra D.Kyî zî babete ser o wina va: “Ma hila şandî bi erbane deyîranê kurdî vatênê. Ma erbane cina û tayê pere qezenç kerd. Dima ra polîsî ameyî û ma dekerdî otobuse mîyan. Polîsan ma ra va ‘şima deyîranê sîyasîyan vanî’ û ma heta nimajê serê sibayî nezaret de mendîy. Verê îfadeyê ma girewtî û dima ra ma berdî vernîya Keyeyê Mamostayan yê Şîşlî de verdayî. Badê ke polîsan ma verdayî, ma tehdît kerdî û ma ra vatî ‘reyna deyîranê kurdî û yê sîyasîyan mevajênê. Eke şima reyna vajî ma do ceza bidîy şima’.”
D.Kyî va ‘aye roje ra dima mi reyna Caddeyê Cumhurîyetî de bi erbane deyîre va, labelê tehdîtanê polîsan ra dima deyîra ke ez tewr baş zana daxî mi tersî ver şaş va’.
DÎHABER/WAN