Rayverê Şarê Kurd Abdullah Ocalan 18 serrî yo Îmrali de bin tecrîd û şertanê zaf zehmet de xover dano. 5ê Nîsan 2015î ra na het zî bi Ocalanî ra pêdîyayîş nêvirazîya. Şarê Kurd ke endî tehamulê ci tecrîdî ra nêmendo seba serbestîya rayverê xo ser payan de yê. Tewr vêşî zî cinîyê Kurd na rewşî ra reaksîyon damûsnenê û bi omidê rojanê resayîşê rayverê xo ciwîyenê.
Cinîyanê Amedij ke tecrîdî ra hêr damûsnay vistî vîrî ke Tirkîye û Kurdistan de kaos esto û no tecrîdî ra cîya nîyo. Cinîyan vatî verîya ke tecrîd bîro keyeyê herkesî ganî tecrîdê Îmrali bîro şikitiş û vengdayîşê dekewtişê hereketî day.
‘Mavêna çehar dêsan de têkoşîn dano
Hemseroka DBP yê Amedî Rûken Akça ke derheqê babed de qisey kerd da zonayen ke Tirkîye de vera cinîyan, domanan, gencan, tepişteyan û merdeyan zî îxlalê heqî yenê kerden. Akça vist vîrî ke tecrîd Tirkîye de sûcanê însanî ra yewêr o û wina qisey kerd: “Pêrokîn dinya no sucî ra çimanê xo gêno. Tepiştişê birêz Ocalanî ra na het şarê Tirkîye zey ke girotxaneyê akerdeyî de ciwîyenê. Jewêr heqê însanî zî nêgirotîyeno dîqetî û zext yeno ferzkerdiş. Vera Birêz Ocalan ke mavênê çehar dêsan de zî seba serbestî û yewîya şaran têkoşîn dano, tecrîd roj bi roj yeno girankerdiş. Eleqeyê na muamele bi însanîyetî ra çin o.”
Dewlet sernêkewt
Rûken Akça ard ziwan ke tecrîd tenya vera Ocalanî nîro ramiten, şexsdê Ocalanî de vera şaran yeno ramiten. Akça vist vîrî ke şarê Kurd zonayîşê polîtîkayanê hikûmetî de ya û wina va: “Çîyo ke 15 serrî yo ferz beno ma ferqê ci de yê. Winî fikir kenê ke, eke ê Ocalanî bigîrê bin tecrîdî, dê Şarê Kurd zî bigîrê bin tecrîdî. La Rayverê ma, ma dê damûsna ke, ma mavêna çehar dêsan de bê zî ma azad ê. Bi saya perspektîfo ke da, şarê Kurd xover dano, têkoşîn keno û serkewno. Dewlet polîtîkayê tecrîd, teslîmgirewtişî û pelexnayîşî de sernêkewt.
Kaos tecrîdî ra cîya nîyo
Îdarekara HDP yê Amedî Gulseren Pervane zî hayr ant netîceyanê tecrîdî yê girotxaneyan ser û aşkere kerd ke, tecrîd hetê fizîkî vera Ocalanî, hetê civakî ra zî vera pêrokîn şarê Kurd yeno ramiten.
Pervane da zonayen ke girewtişê Lîderê yew şarî bin tecrîdî, him hetê însanî ra him zî hetê civakî ra yew sûc o û va, ‘Ma no tecrîdî nêsilasnenê’. Gulseren Pervane dîyar kerd ke Tirkîye bi ferzkerdişê tecrîdî him hiqûqa mavênneteweyî, him zî hiqûqa xo nêsilasnena û wina dewam kerd: “Tenya vera birêz Ocalanî nê, şexsdê birêz Ocalanî de heqê pêrokîn tepişteyan yenê îxlalkerdiş. Tepişteyî bi hefteyan hucreyan de yenê girotiş. Pêdîyayîşê înan bi malbatan ra yenê qedexe kerdiş. Tirkîye û Kurdistan de nika kaos esto û eleqeyê no qaosî bi tecrîdî ra esto.”
‘Ganî tecrîd bîro şikitiş’
Îdarekara HDP yê Amedî Pervane waşt ke hikûmet nê kerdenan ra fek verado û ca de bi Ocalanî ra destpê pêdîyayîşan bikero. Pervane vist vîrî ke Tirkîye nika tengîyêke de ya û encex êşkena bi perspektîfê birêz Ocalanî na tengî ra bivejyo û bi nê vatenan qiseyanê xo qedêna: “Ganî şarê Tirkîyeyî leyê têkoşînê şarê Kurd de vinderê û tecrîdî qebûl nêkerê. Tecrîd leteyêke planê qirkerdişî yo. Eke hina dewam bikero, do tecrîd bireso heta zerreyê keyeyanê ma. Ganî ma tecrîdo ke ser birêz Ocalanî de ferz beno bişiknê.
AMED