DÎLAN BABAT / ZEYNEP TURGUT / JINNEWS/MÛŞ
Tirkîya de OHALo ke 2016 de ame îlankerdiş ra dima zîndanan de neheqî, zext û şîddet zêde bî. Mîyanê yew serre û nîme de bi hezaran kesî tepişîyayî û zafaneyê nê kesan zî hîna nêameyî mehkemekerdiş.
Mêrde, kêna û lajê Gulê Erdogane ke tarîxanê cîya-cîyayan de ameybî tewqîfkerdiş zî mîyanê nê kesê ke tewqîf bîyî de yî û hîna mehkemeyê înan nêameyo viraştiş.
Gulêye va ‘kêna û mêrdeyê mi Zîndanê Muşî de yî, lajê mi zî Zîndanê Isparta de bî, labelê surgunê Stenbolî bî’ û wina dewam kerde: “Ti sebeb nîşan nêda û endamê keyeyê mi eştî zîndan. Tena sebebêkî esto, o zî şîyayîş û ameyîşê HDP yo.”
Bi aşman o zîndan de yî
Gulêye va ‘5 domanê kênaya mi estî û nika orte de mendî’ û domnaye: “Kênaya mi bi aşman o Zîndanê Mûşî de ya. Mêrde û domanê mi fikrê xo ver zîndan de yî. Her roje hîna zaf zextî hepsîyan ser de yenî kerdiş. Rojê pêvînayîşî de ezîyet bi ma kenî. Ez hewl dana xo biresna hemînan. Wazenî bi nê polîtîkayan ma bitersnî. Labelê ê do sernêkewî. Ma do fek domananê xo ra veranêdî.”
Ganî ma bêveng nêmanî
Gulêye dîyar kerde ke lajê aye wextê surgunî de hetê gardîyanan ra ameyo derbkerdiş û wina va: “Seba ke hetê ekonomîkî de problemê ma estî, ma nêşenî şêrî pêvînayîşî. Ma hedîseyê zîndanî ra zaf erey hayîdar benî. Ganî ti kes vera nêyî de bêveng nêmano. Nika hewl danî ke cilanê tek tîpan bi hepsîyan bidî xoradayîş. Labelê senî ke domanê ma zere de xover danî, ganî ma zî teber de xover bidî û bêveng nêmanî. Heta nika mêrde û domanê mi nêvetî mehkeme, wa heme hepsîyî serbest bêrî veradayîş.”