Parlamentera HDPyî Salîha Aydenîze dîyar kerde ke Ocalanî pêvînayîş de qala manîfestoya aştîye ya 2013î kerda û wina va: “No zaf qîmetin o. Ocalan seba Tirkîya û Rojehelatê Mîyanênî nîmet o. Eke problemê pîyacuyayîşê şaran û ameyoxê Tirkîya esto, o wext ganî Tirkîya vengdayîşo pêyên yê Ocalanî baş biwano.”
Rayberê Şarê Kurdî Abdullah Ocalanî tecrîdê 2 aşman ra dima avûkatanê xo dir pêvînayîşêk kerd. Pêvînayîş ra dima avûkatan mesajê Ocalanî eşkera kerd û ame zanayene ke Ocalanî pêvînayîş de dîyar kerdo ke o hewl dano Kurdan rê ca akero û veng dabi hukmatî ke wa seba çareserîya problemî berpirsîyarî bigîro.
Ocalanî pêvînayîş de dabi zanayene ke o xo ra bawer keno û seba çareserîye amade yo û wina vatbi: “Labelê ganî aqlê dewlete zî çîyo ke hewce keno, bikero.” Babete ser o Parlamentera HDPyî ya Amedî Salîha Aydenîze qisey kerde. Aydenîze bale ante muhîmîya mesajê Ocalanî ser û daye zanayene ke rayîrê aştîye Girawa Îmrali ra vîyareno.
Aydenîze va ‘eke raşta zî aştîye yena waştene, ganî cewabê vengdayîşê Ocalanî bêro dayene’ û wina dewam kerde: “Eke hukmat raşta zî çareserîye wazena, ganî goş bido vatişanê Ocalanî ke hetê bi mîlyonan kesan ra sey îrade hesibîyeno. Nîjadperestîye ver ma 200 serrî veng ra derbaz kerdî. Coka ma nêşênî 200 serranê bînan vînî bikerî. Şansêkê ma yo winasî çin o.”
Seba ameyoxê şaran muhîm o
Aydenîze qiseykerdişê xo de qala astengkerdişê pêvînayîşan kerde û bale ante polîtîkaya tecrîdî ser. Aydenîze qiseykerdişê xo wina domnaye: “Astengkerdişê pêvînayîşan û tecrîd, beno sebebê şer û krîzê ekonomîke û sîyasî. Ocalan aktorêko tesîrin o, labelê îqtîdarê AKPyî nêwazeno nêyî bivîno û polîtîkayanê şerî de israr keno.”
Ocalan seba Tirkîya nîmet o
Aydenîze va ‘Ocalan eşkeno Rojhelato Mîyanên û Tirkîya de aştî û demokrasî awan bikero’ û wina dewam kerde: “Astengbîyayîşê pêvînayîşê Îmrali qewimîyayîşanê Rojhelatê Mîyanênî ra cîyayêr nîyo. Heme Rojhelato Mîyanên de şer de yeno israrkerdene. Ocalanî pêvînayîşo peyên de qala manîfestoya aştîye ya 2013î kerde û va ‘ez eşkena hewteyêk de çareser bikera’. No mesaj zaf qîmetin o. Ocalan seba Tirkîya û Rojhelatê Mîyanênî nîmet o. Îqtîdar nêwazeno bivîno û ewro halê Tirkîya werte de yo. Hewldayîş û israrê Ocalanî seba ameyoxê Tirkîya zaf muhîm o.”
Bêxera pîyacuyayîşî sewbîna çare çin o
Aydenîze qala vengdayîşê aştîye yê Ocalanî kerde û wina va: “Vera nê vengdayîşî de Tirkîya hêrişê Başûr û Rojhelatê Kurdîstanî kena. Nê hêrişî netîceyê dişmenîya Tirkan de yenî viraştene. Vera Kurdan de dişmenîye kenî û na dişmenîye raştîya xo de vera şaranê Tirkîya de yena kerdene. Çimkî Kurd û Tirkî bi hezar serrî yo ke pîya cuyenî. Ma eşkenî nimuneyanê Milazgîr û Çanakkale bidî. Dişmenîya ke vera Kurd û Tirkan de yena kerdene, hertim her di hetan rê zî dayo vînîkerdene. Ewro vera Rojawan û Başûrê Kurdîstanî de şer kerdene, operasyon viraştene, îxanetê bi Tirkan kerdiş o zî. Bêxera pîyacuyayîşî sewbîna çare çin o.”
Ganî îqtîdar baş fam bikero
Aydenîze qiseykerdişê xo de qala ‘Prosesê Dîyalogî’ ke mabênê 2013 û 2015î de amebi domnayene kerde û wina qedênaye: “O wext ma hemînan dî ke şaranê Tirkîya senî mîyanê huzûrî de pîya cuya û zemînêko komelkî ame awankerdene. O prosesê dîyalogî bi. Herçiqas ke o proses derbazê muzakereyan nêbibi zî şar de hêvî awan kerdbî. Eke merdim tîya ra biewnîyo, o wext merdim vîneno ke eke problemê pîyacuyayîşê şaran û ameyoxê Tirkîya esto, o wext ganî Tirkîya vengdayîşo pêyên yê Ocalanî baş biwano.”
MA/AMED