Nisêbîn de hêrişê dewlete ke bi aşman domîyayî ra dima, taxê Kanika, Firat, Yenîşehîr, Abdulkadîrpaşa û Newroz ke tede xoverdayîşê xoserîye ameybî ciwîyayîş, dewlete dormeyê nê taxan bi têlan pîşta û nika keyeyê ke bi hawayo saxlam mendî, rijnena. Ameyîşê zimistanî û rijnayîşan ver şarê herême zehmetîyê gird ciwîyenî.
Babete ser o Sereka Şaredarîya Nisêbînî ya kehene Sara Kayaye qisey kerde û seba Nisêbînî vengdayîşê hetkarîye kerde.
Dewlete hema zî rijnena
Kayaye va ‘badê hêrişê ke bi aşman dom kerdî, rijnayîşêko gird virazîyayo’ û qiseykerdişê xo wina domnaye: “Dewlete rijnayîşê Nisêbînî rê dewam kena û keyeyê ke bi hawayo saxlam mendî zî yew bi yew rijnena. Dewlete waştişê agêrayîşê şarê Nisêbînî rê goşê xo padaya û planê çinkerdişî yê topyekunî vista dewre. Şarê Nisêbînî do vera nê planê çinkerdişî de xover bido.”
Hetkarîyî qîm nêkenî
Kayaye dewamê qiseykerdişê xo de dîyar kerde ke ‘dewlete wazena şarî mîyanê keyeyanê xo de hepis bikera’ û qiseykerdişê xo wina qedêna: “Şarê Nisêbînî dekewtişê keyeyanê dewlete qebul nêkeno û nêyî zî bi waştişnameyanê xo dewlete ra vato. Bi ameyîşê zimistanî ganî piştîdayîşêyewbînanê şarê Nisêbînî reyde bêro girdkerdiş. Hetkarîyî qîm nêkenî. Hewldayîşê hetkarîye yê şarê Mêrdînî zaf muhîm o, la bes nîyo. Ganî hetkarîyê malzemeyê zimistanî bêrî kerdiş. Nika lazimîya şarê Nisêbînî yê soba, batanî û sewbîna estî. Ma na çarçewe de paweyê hetkarîya şarê Kurdistanî yî.”
SEDAT SUR / ANF / MÊRDÎN