Namzeda wekîlîya HDP ya Stenbolî Fîlîz Kerestecîoglu derheqê tayîn babetan de îzehet day. Kerestecîoglu îzehetê xo de ard ziwan ke encax cenî eşkenî zîhnîyetê mêrdeye ya Meclîsî bibedilnî û wina domna: “Ravêreyeya Meclîsî zaf kilm vîyart. Ma bi temamî 22 an zî 24 saet Meclîsî de mendî. Labelê ma zaf hewl da ke Meclîsî heta 1’ê citmenge akerde bigîrî. 1’ê citmenge Meclîs abî û rayna padîyay. Ma derheqê perwerdeyê domanê bextwaştoxan, îşkenceyê ke laşê Ekîn Wanî ra ameybî kerdiş û sewbîna vernîyaz-persî ma day Meclîsî. Labelê heme sey ke mîyanê ciwalî de bibî, payîvê ma yî.”
Şerî reyde vindert
Kerestecîoglu dergeyîya qalîkerdişê xo de ard ziwan ke hetê cenîyan de êy ke amey bedilyayîş estî û wina vat: “Herinda ke ma şînaynê hemverê qetilkerdişê cenîyan de têkoşîn bidî, bi şerê ke ame destpêkerdiş ma amey tengkerdiş. Mîyanê nêy şerî de êy ke aştîye ra rayvertî kenî zî cenî yî. Xora têkoşînê aştîye nêbo, çîyek nêbeno. Şerî reyde cuye vindert, semedê cenîyan zî heman çî qewimya. Labelê têkoşînê cenîyan zî mîyanê nêy şerî de teng bi. Cizîr, Licê, Nisêbîn û Hezexî de min dî ke cenî paştî daynê yewbînan. Lazimîyek inasarên estbî.”
Sebebê zilmî no yo
Kerestecîoglu qalîkerdişê xo de bal ant ser xoverdayîşî û qalîkerdişê xo wina peynî kerd: “Her çend ke Cizîr, Nisêbîn û Licêye de tecrubeyê şarî ya bi dejin estbî zî, şar rayna zî vecya papolan. Dima rayna şarî ra zilm ame kerdiş û sebebê nê zilmî zî xoverdayîşê şarî bi. Yanî hukimat hende payîvê xoverdayîşekî gird nêbî. Labelê xoverdayîş nêvindeno. Beno ke birayê ma yê kurdî bivacî ‘semedê çi rojawanî ra veng nêvecyeno’ raşt o heman veng nêvecyeno, labelê rojawanî de zî hemverê nê zilmî bertekî estî. Verîya 7’ê hezîrane ma bi diruşma ‘Ma do to nêkerî serek’ serkewtî û tîya de ma dîy ke ma eşkenî serbikewî. Labelê dima ma çîyo ke nêhesibnabi ma cuyay. Qetlîamê Pirsûsî û dima çîyê ke amey cuyayîş ma sero xeylê bandor kerd. Rayna zî ez vana ke ma eşkenî vernîya nêy zilm û zordarî bigîrî.”