Hemserekê Pêroyî yê HDPyî Selahattîn Demîrtaşî kombîyayîşê grûba xo de qisey kerd û va: “Erdogan roja ke dest bi kerdişê sîyasetî ra nata xeyalê girewtişê Amedî keno û no xeyal bîyo kabûsê Erdoganî. Heme komel bin zextî de yo û nê semedî ra ganî xoverdayîş zî bibo malê komelî.”

Hemserekê Pêroyî yê HDPyî Selahattîn Demîrtaşî kombîyayîşê grûba partîya xo de derheqê prosesî de qisey kerd. 

Demîrtaşî destpêka qiseykerdişê xo de va ewro meclis de tena mekanizmaya kombîyayîşê grûbe menda û wina va: “Komîsyonî nêxebetyenî û Heyetê Pêroyî ver bi vindetişî şono. Nê semedî ra kombîyayîşî çapemenîye zaf muhîm î. Ez welatîyê ke seba piştîdayîşî ameyî rê spas kena.”

‘Her kes bin zextî de yo, ganî her kes xover bido’

Demîrtaşî dewamê qiseykerdişê xo de va ewro zilmê îqtîdarê AKPyî û Qesre, keyeyo ke nêresayo nêmendo. Eke şima çeteyê ke dormeyê qesre de yî, nêhesibnê, her kes bin zextî de yo. Ya karî ra ameyo eştiş, ya zî derheqê ci de tehqîqat dîyayo destpêkerdiş. Rewşêka winasî de ganî her kes dormeyê edaletî de kom bibî. Ma rojê ke ganî heme komel xover bido, rojê wina sî de yî.”

Amed bîyo kabûsê Erdoganî

Demîrtaşî va ma çîyo ke ame sereyê Kişanake, Anli û Ataye ser dîy û qiseykerdişê xo wina domna: “Şaredarîyê ke bi weçînayîşî nêşînayî bigîrî, nika bi operasyonanê winasî wazenî bigîrî. Erdogan roja ke dest bi sîyasetî kerdo ra nata, xeyalê ci de girewtişê Amedî esto. La Amed bîyo kabûsê Erdoganî. Eynî wextî de Wan zî wina yo. Her weçînayîşî de netîceyê her di bajaran nizdî ra taqîp keno. Heta o bi xo wexto ke sindoqî abenî, telefon akeno û netîceyê sindoqan pers keno û her tim zî xeyalê ci sereyê ci ser de rijîyenî. Ma vilawekê weçînayîşî vila kerd, la ê pere vila kerdî. La ma reyna zî qezenc kerd.”

Pere yê şarî yo

Demîrtaşî qiseykerdişê xo de va heta nika kasayanê şaredarîya ma ra yew quruş daxî nêşîyo koyî rê û wina dewam kerd: “Serekê şaredarîyanê ma pereyê şarê xo nêerşawenî sewbîna cayî. O pere yê şarî yo û ganî seba ê bajarî bêro xebetnayîş. Heta nika ti dozger çîyêko winasî nêvato. Şima şerm nêkenî, medyaya xo de çîyê winasîyan vanî û îftîrayê ma kenî. Sey yew serekwezîrî ti şerm nêkenî gelo? Bivejyî hawayo aşkere vaje ‘Ma nêşkenî şaredarîyan bigîrî û ma do bi dizdîye şima ra bigîrî’ Eke şima wazenî qayûman tayîn bikerî, ez şima rê di finakan bida: Kadîr Topbaş û Melîh Gokçek. Eke şima qayûm tayîn kenî, tayînê kesê ke Ankara parçe parçe rotî, înan rê tayîn bikerî. Xora ê bi xo îtîraf zî kerdbî. Wa Homa belayê şima bido.”

Çapemenîye rê derbe

Demîrtaşî qiseykerdişê xo de bale ant ser sansurêko medya ser de yo û wina va: “Derbeya ke çapemenîye ser de 15ê temuze ra nata dewam kena. Tewr peynî çîyê ke ame sereyê Rojnameyê Cumhurîyetî ser şima zanî. Nika hesabê ‘ma do senî rojnameyê Cumhurîyetî bigîrî destê xo’ kenî. Rojnameyê Azadiya Welat ke rojane bi kurdî weşan kerdêne, ame padayîş. Reyna ajansê yewine yê cinîyan JINHA ame padayîş. Wazenî her kesî teslîm bigîrî, çimkî her keso ke teslîm nêbo seba înan beno tersêko pîl.”    


 ANF / ENQERA