Ti hen zonena Hitler ra ginê waro.
Raya kana onca newede doskerda.
Raya kane raya merdene.
Raya kane raya înkar kerdene, raya herbî.
Nika herkes bîyo Atatürk, bîyo Çiller, bîyo Ağar venga Abdullah Çatlı danê.
Tewa newe nêbî.
Mûnafiqan zurî kerdî, hometa mezgzare pê îman kerd. Pêro meseleyî hurendya xo de mendî.
9 serrî hen ameyî hen şî. Mordemeku warê xo kerd qayîm û peynîye de eskerîya xo nêro.
Verecoy vatenê ‘eskerî nêverdanê, halkerdena mesela rê benê manê.’ Nika eskerîye gurete xo dest, hukumatê Anqara fermanê kistene endî bi xo dano. Pêro wastena xo na bîye. Weçînîtîs ra bi weçînîtîs berva Erdoğan vat ‘mara avê hukumatan maya Tirkîya fîşta bervîs, demokrasî werte ra da we, dewlete dara çetan dest.’
Nika o bi xo maya Tirkîya fîno bervîs, nika o bi xo vayê faşîzmî ano, nika o bi xo fermanê kistene dano. Endî herçî bi xoyo.
9 serrî dêrs bî şî.
Nika mayî onca bervenê.
Merdene ramit û ramena, heqî nêameyî dayene û înkar benê.
Hukumatê Anqara merdene ra qederî tewa nêzoneno.
Maye Kurdî seweta haştîye gureyenê, seweta eskerune tirkî heştîran kenê war, çîtanê xo erzenê caye merdena eskeran ser. Manê naye seweta famkerdoxan zaf girs o.
Mayê tirkî vanê ‘ez dicanu, nejdîde onca jû eskerî an dîna, o hêf ceno’ seweta herbî xo kenê amade, dergusa zerrê xorê qerarê merdene danê.
Çi mayî yê nî?
Eman, eman, eaman!
Heqo ti nî mayan mara dûrî berê!
En çîyo mûhîm kî na hukumatî leto jede yê çapemenîya tirkî fîşto ra xo dest.
Rojnamevan û nustoxe na çapemenîye hen zonena Joseph Goebbels ra ginê waro.
Qelema nînan kî, jê hukumatê xo teyna kistene, herb û riznayena naskena. Propaganda henene kenê ke, qe mevazê.
Nî propagandîstanê hukumtî naye ra avê vatenê ‘hukumat na weçînîtîs ra dima, na referandum ra dima na mesela halkeno’ nika kî vanê ‘na herb ra dima.’
Yanê vanê ‘verecoy Kurdan bikisê, dima mesela halbikerê.’
Mantiqê û mentalîta nînan na wa.