Mudirîya Şaxa Astengdaran a ke girêdayîya Şaredarîya Bajarê Gird a Amedî ya û Serekîya Xizmetanê Sosyalan ser o xebatan kena semedê gedeyê ket ede sendromê otizm û down esto ektîvîtaya asnawkerdişî organîze kena. Gedeyî her hewte roja sêşeme 3 saetî hewnze de asnaw kenê û na aktîvîte heta aşma Êlule dewam kena.
Aktîvîteyî hewza ke Taxa Huzurevlerî de ca gêna û ayîdê Şaredarîya Peyasî ya de organîze benê. 5ê xo otizmin, 28ê xo sendromê down pêroyî de 33 gedeyî beşdarê na aktîvîte benê. Çenteyê paştî, hawlî, telîk, bone û tîşortî bê pere gedeyan rê ameyî vilakerdiş. Perwerdeyê asnawî zî hetê perwerdekayanê pisporan ra yeno dayîş. Gedeyê ke asnaw kenê pê keyfweş benê û benê rehet.
Aktîvîteyanê fîzîkî
Mudira Şaxa Astengdaran ya Serekîya Dayîreyê Xizmetanê Sosyalan Dîren Ozkan Balsake derheqê xebatanê înan de û aktîvîteya asnawkerdişî de qisey kerd û zanayîş da. Balsake va “Semedo ke ma desteg bidê gedeyê ke înan de sendromê otizm û downî esto ma aktîvîteya asnawkerdişî organîze kerd. Asnawkerdiş aktîvîteyanê fîzîkî ra en muhîman ra yew o. gedeyê ke înan de sendromê Otizm û downî esto hetê goşdarîkerdiş ra gereke bêrê destegkerdiş. Semedo ke hetê goşdarîkerdiş de avere şêrê zî lazimo bi aktîvîteyanê fîzîkî bêrê destegkerdiş û qewetkerdiş.”
‘Gedeyî hewzan de keyfweş ê’
Balsake dewamê qiseykerdişê xo de îzah kerd ke, antengdaranê beden û yê bînan de meylê asnawkerdişî zêde yo û înan rê no war de talebî zaf ê û wina va “Ma ewil perwerdeyê asnawî danê gedeyê ke înan de sendromê down û otizmin ê. Astengdarê bînî zî hewzanê şaredarî yê bînan ra îstîfade kenê. Ma par zî winasî yew aktîvîte organîze kerd. Ma na aktîvîte de vîna ke, gedeyî bi keyfweşî asnaw kenê û zaf pê benê keyfweş. Wexto ke ma newe kerd keyeyan na keyfweşî zaf fehm nêkerd. Aye ra humara ma kêm bîye. La emser muracatî zêde bîyê. Bi israr asnawkerdiş pers kenê û gedeyî hewze de zaf keyfweş ê. Keyeyî zî no wezîyet ver keyfweş ê. Çimkî gedeyî bi no qayde hem hetê sosyalîte, hem zî hetê psîkolojîk de benê rehet.”