Qezaya Yayladagi ya Hatayî de Kampê Tekelî yê Yayladagi yeno vengkerdiş û bextwaştoxê ke tîya de yî zî do bierşawîyî Kampê Tekelî yê Bohşînî. Labelê seba ke esnafanê qeza îtîraz kerd, nika no qerar ameyo vindarnayîş. Ame musayîş ke tena bextwaştoxê erebî ke kamp de yî nê, bextwaştoxê ke qeza mîyan de cuyenî zî do bikirişîyî Kampê Bohşînî. Seba ke sera 95ê qeza tirkmenan ra pê yeno û tena çimeyê debarî yê qeza zî bextwaştox î, şar nêwazeno ke bextwaştoxî bêrî vetiş.
Şarê qeza dîyar kenî ke kirişîyayîşê bextwaştoxan do hetê ekonomî de înan mexdur bikero. Şarê qeza dîyar kenî ke bextwaştoxê ke qeza û qampan de bica bîyî, çimeyê înan yê debarî yî û şarê qeza tersenî ke do kîrayê keyeyan bikewo. Reyna şarê qeza vengmendişê bi seyan awanîyê ke seba bextwaştoxan amebî viraştiş ver etiryenî.
Grûbê sîlehinî
Heto bîn ra yeno îdîakerdiş ke netîceyê pêameyîşo ke mabênê Tirkîya, Rûsya û Îran de virazîyayo de grûbê tirkmenî yê sîlehinî ke Lazkîye de mîyanê OSO de şer kenî do kamp de bêrî bicakerdiş. Şarê qeza zaf etiryenî. Şarê qeza vanî ‘netîceyê pêameyîşî de sey Helebî do grûbê sîlehinî yê ke Lazkîye de yî bêrî vetiş û bikirişîyî kampî; eke wina bibo no seba ma felaket o.’
DÎHABER / HATAY