Hemserekîya Konseyê Caardişî yê KCKyî îzehetêko nuştekî daye û derheqê raporo ke CPTyî 2 serrî ra pey aşkere kerdo de wina vato: “No raporêko skandal o û sereyê merdimî de beno sebebê tayê şikan. Ganî sere de cinî, ciwanî û şarê ma û hêzê demokrasî vera CPTyî de vindetişê xo nîşan bidî û çalakîyanê xo zêde bikerî.” Nizdîyê 3 serrî yo ke Rayberê Şarê Kurdî Abdullah Ocalanî ra ti xebere nîna girewtiş û no het de etirîyayîşêko gird raya pêroyî de esto. Komîteya Vernîgirewtişê Muameleyê Xirabî û Îşkenceyî (CPT) ke 2 serrî verê Îmrali de pêvînayîşî viraştbî, raporê xo yê Îmrali 2 serrî ra dima aşkere kerdbî. Seke yeno zanayîş no rapor dagîrbîyayîşê merkezê Efrînî ra 2 rojî dima ame aşkerekerdiş û no zî sereyê merdimî de şik virazeno. Hemserekîya Konseyê Caardişî yê KCKyî derheqê nê raporî de îzehetêko nuştekî daye. KCKyî îzehetê xo de dîyar kerdo ke raporê CPTyî xizmetê nimitişê zextê ke Îmrali de zêde benî, keno. KCKyî dewamê îzehetê xo de qala bêcîddîyetîya raporî kerd û wina va: “Tirkîya de 2 serrî ra zêde yo ke şert û mercê OHALî estî û zext û tedayê tewr giranî benî. CPT zî raporê zîyareto ke 2 serrî verê ameyo kerdiş, newe aşkere keno. No zî bêcîddîyetîya înan nîşan dano. 2 serrî ra dima rapor de yeno vatiş ke ‘ganî keye û avûkatî pêvînayîş bikerî’. No çîyêko skandal o. Mîyanê nê 2 serran de vera şarî de xeylê çîyî yenî kerdiş. Heta nika bi seyan cinî, doman û extîyarî Efrîn de ameyî qetilkerdiş.” Îmrali de tayê çîyî yenî nimitiş KCKyî dewamê îzehetê xo de wina va: “2 serrî ra pey aşkerebîyayîşê raporî nîşan dano ke tayê çîyî yenî nimitiş, yan zî serê tayê çîyan yenî padayîş. Demê peyênan de tayê xeberê ke vanî Îmrali de Rayberîya ma ser o zextî zêde bîyî, yenî û bi nê raporî zî hewl danî serê ci padî. Ma tecrubeyanê xo ra zanî ke wexto ke faşîzmê AKP û MHPyî zêde beno, tesîrê ci yo sifteyîn Îmrali de yeno dîyayîş. Cok ra CPT herinda ke 2 serrî ra pey rapor aşkere keno, ganî ser na rewşe de bivindero. Çimkî raporê CPTyî şar de hîna zaf etirîyayîş virazeno. Herkes zano ke karê CPTyî vengdayîş nîyo. Na rewşe Konseyê Ewropaye zî eleqeder kena. Ganî Konseyê Ewropa berpirsîyarîya xo bîyaro ca.” KCKyî peynîya îzehetê xo de bale anto çalakîyan ser û wina qedênayo: “Şarê ma û hêzê demokrasî raporê CPTyî qebul nêkerdî û etirîyayîşê xo vatî. Ganî sere de cinî û ciwanî, şarê ma û hêzê demokrasî vera CPTyî de vindetişê xo nîşan bidî û çalakîyanê xo zêde bikerî.” CPT zî berpirsîyar o Wekîla Serekîye ya Grûba HDPyî û Huqûqnase Meral Daniş Beştaşe zî derheqê tecrîdo girankerde de qisey kerde. Beştaşî wina va: “CPTyî 2 serrî ra dima derheqê tecrîdê girankerde yê Îmrali de îzehet da û no zî nîşan dano ke CPT sey dezge îşkenceyî qebul kerdo. CPT derheqê muamele û îşkenceyê ke Îmrali de benî de qasê îşkencekaran berpirsîyar o. Ganî demêko rewêr rayîrê Îmrali bêro akerdiş.” MERKEZÊ XEBERAN