Îrfan Kiliço ke Zîndanê Kandira yê Kocaelî de wefat kerd û sebebê mergê ci sey xo veşnayîşî ame zanayene, keyeyê ci cenazeya ey girewt û da eşnawitene ke bedenê ey de şopê îşkenceyî estê û beno ke Kiliç ameyo înfazkerdene.
Ame musayene ke çewlîgij Îrfan Kiliço ke 2 rojî verê Zîndanê Kandira de wefat kerd û xebera mergê ey sey çalakîya fedaîye ameye vilakerdene, cenazeya ci vizêr Xarpêt de teslîmê keyeyê ci bîye. Keyeyê Kiliçî meyîtê xo saetanê şanî de qezaya Bongilanî ya Çewlîgî de defin kerd.
Keyeyê Kiliçî yo ke xoveşnayîşê lajê xo ra bawer nêkeno, verê şitişê meyîtî bi telefonî dimenê ci antî û ramot ke bedenê ey de şopê îşkenceyî estê. Keyeyê Kiliçî şik keno ke lajê înan Îrfan Kiliç ameyo înfazkerdene.
Mûyê ci daxî nêveşayî
Birayê Kiliçî Husamettîn Kiliçî qisey kerd û dîyar kerdene ke birayê ey rê îşkence ameyo kerdene. Kiliçî wina domna: “Wextê şitişî de ma veng da 15 tenan û ê zî ameyî meyît ra ewnîyayî. Sereyê Îrfanî bi çîyêko wişk ameyo pelçiqnayene. Sereyê ci şikite bi. Didan û çeneyê ci zî şikîyabi. Binê goşê ci de qulêk estbî, ma nêzanî ka gule ginaya an zî şîşêk reyde ameyo qulkerdene. Yeno vatene ke Îrfanî xo veşnayo, labelê mûyê Îrfanî zî nêveşayî. Tena tay linge ci veşayî. Seke mergî ra dime ameyo veşnayene. Ti kes îzehet nêdano. Tena dozger vano ke Îrfanî gardîyanan dir kewto munaqeşe û wina bîyo. Yeno vatene ke ey xo dima notêk verdayo, xebera înan nê notî ra çin a. Ma dîmenê meyîtî antê û ma do muracatê dozgerîye bikerê.”
ÇEWLÎG