MUJDAT CAN / MA / MÛŞ
3ê teşrîna verêna 1993î de qezaya Korkutî ya Mûşî de keyeyêk amebi veşnayene û 9 kesî bi hawayo ganî ameybî qetil kerdene. Hedîse raya pêroyî de sey Qetlîyamê Vartînîsî yeno zanayene. Keyeyî ra Aysel Ogute tena sax xelisîyaybî û Ogute babete ser o muracatê sucî kerdbî. Muracatê sucî ra dima derheqê çend kesan de doze abîybî, labelê qerarê beratî dîyabi.
Avûkat Kadîr Çelîkî îtîrazê doze kerd û dozgerê Yargitayî waşt ke wa qerar bêro betal kerdene. Şahidê Qetlîyamê Vartînîsî Casim Budakî va ‘ma wazenî wa cezayêka girane bidîyo berpirsîyaran’ û wina dewam kerd: “Çimkî aye roje heme çî ameyî veşnayene û 7 hezar 500 kesî ra zafê ci koç kerdî.”
Şahidan ra Hekîm Ogutî da zanayene ke herçiqas ke 25 serrî derbaz bîyî zî, înan hedîse xo vîra nêkerdo. Suleyman Elçîyî zî wina va: “Eke ceza bidîyo berpirsîyaran ma do kêfweş bibî. Labelê bawerîya ma bi huqûqî çin a.”
Destûr nêdîya ke ma mudaxale bikerî
Datîzayê Nasir Ogutî Remzî Ogutî zî va ‘pêrodayîş ra dima leşkerî ameyî û dîyar kerdî ke ê do dewe biveşnî’ û wina dewam kerd: “Dima ra leşkeran dewe veşna. Ma çend rey waşt şewat hewna bikerî, labelê leşkeran destûr nêda. Ez her ke şona muzeya ke seba datîzayanê ma ameya awan kerdene, ê yenî vîrê mi. Ma vîrîkerdişê Vartînîsî mumkin o?