Fermandaranê HPGyî ra Dr. Bahoz Erdalî va ‘dewleta Tirkî her ca de hêrişê kurdan kena’ û wina domna: “Bêşik o ke gerîlayê Kurdistanî cewabo ke ê heq kenê dano înan. Başûr, Vakur çayê Kurdistan beno wa bibo vera hêrişan de gerîlayê Kurdistan cewabê înan dano.”
LALEŞ RÊNAS / EKÎN WAN / ANF / BEHDÎNAN
Fermandaranê Merkezê Qerargehî yê HPGyî ra Dr. Bahoz Erdalî bi wesîleya serrgêra 15ine ya Hemleya 1ê Hezîrane ser o qisey kerd û mesajê muhîmî dayî.
Dr. Erdalî da zanayene ke Ocalanî vera komploya mîyanneteweyîye gamêka stratejîke eşta û 1999 de prosesê adirbirnayîşî dayo destpêkerdene û wina domna: “Rayber Apoyî semedê çareserkerdişê problemê Kurdî şansêk dayo înan labelê dewleta Tirkî no şans nêşuxulna, 5 serrî ma mijul kerdî. 2002-2003 de bi eşkera ke bê tasfîyekerdişê ma yewna amancê înan çin o. Semedê tevgerê ma qerarê Hemleya 1ê Hezîrane ya 2004î xoverdayîş, têkoşîn û cuye de hewceyêko tarîxkî bi. AKPyî waşt ke Kurdan bixapîno. Bi sîyasetê teslîmgirewtişî nêzdîyê ma bîyî. La gerîla û şarî qerarê xo hetê xoverdayîşî ra da.”
Dr. Erdalî dewamê qiseykerdişê xo de qala hemleye kerde û wina va. “No qerarê ma weşê hêzanê mîyanneteweyî nêşi. La şarê ma no qerar sey Hemleya 15ê Tebaxe hesibna û paştî daye ci. Ma no qerar girewt ke ma dengeyanê neweyan ê Rojhelatê Mîyanênî de sey hêzêk ca bigîrê û ma tîya bîyî aktorêk. Hemleya 1ê Hezîrane her ca de tesîrê xo ramot. Başûr de zî hêz da şarê ma. Vernîya şarî akerde. Na hemleye ramojna ke heta ke azadîya Kurdan û Kurdistan çînebî, ameyîşêko roşin ê dewleta Tirkî çirey çin o. Eke na hemleye çinêbîyêne gerîla xo fes kerdêne. Şorişê Rojawan nêbiyêne û vernîya DAÎŞî nêameyêne girewtene. Na hemleye heme leteyê Kurdistanî kerdî bihêz.”
Bedelê naye giran danê
Dr. Erdalî bale ante çalakîyanê gerîlayan ser û wina va: “Dewleta Tirkî Vakur de her firsend de operasyonan virazena. Rojawan de zî her firsend de hêriş kena. Başûr de zî wina. Operasyonê Xakurkê ne verên ne zî do peyên bo. Xora 35 serrî yo ke hêriş kenê. Yanî Başûrê Kurdistanî de şer esto. Dagîrkerîya dewleta Tirkî û tewirê partîyanê sîyasîyan ê Başûrî, Başûrê Kurdistanî keno sahaya şerî. Gerîla hêrişê Xakurkê zî do pûç vejo. Par rayêk înan ceribna ameyî qilêk tepişt û wext ra bedelê naye giran danê. Her roje çend leşkerê înan yenê kiştene. Bêşik o ke gerîlayê Kurdistan cewabo ke ê heq kenê dano înan. Başûr, Vakur çayê Kurdistan beno wa bibo vera hêrişan de gerîlayê Kurdistan cewabê înan dano.”
Ganî Mesajê Rayber Apoyî Raşt Bêro Famkerdene
Dr. Erdalî peynîya qiseykerdişê xo de wina va: “Rayber Apo gird fikiryeno, dûrî vîneno û qeraro cîddî gêno. Bi mesajê xo yo peyên no reyna ramot. Rayber Apo senî ke hêzê çareserîye yo, rayîrê çareserîye zî nîşan dano. Ganî heme muxatabê ey mesajê ey raşt fam bikerê û erjê ci bizanê. Tena hêzê Kurdistanî nê, hêzê mîyanneteweyî zî ganî nê mesajî raşt biwanê. Ê ke hesabê înan Rojhelato Mîyanên de estî ê zî. Şarê Kurd û hêzê ke ey ra giredaye yê. Hêzê mîyanneteweyî heta ke îradeyê Kurdan nas mekerê û hêzê PKKyî hesab mekerê, nêeşkenê Rojhelato Mîyanên de sîyaset bikerê. Ganî heqîqetê PKKyî bêro qebulkerdene. Kurdî sey hêzêk ewro eşkenê dengeyan bibedilnê. Coka hêzê mîyanneteweyî wa mesajê Rayber Apoyî raşt biwanî û sîyasetê xo yê klasîk ê vera ma newe ra çim ra ravêrnê.”