MAHÎR YILMAZKAYA / ANF/BEHDÎNAN
Seke yeno zanayîş 30ê Teşrîna Peyêna 2014î de Kombîyayîşê Heyetê Ewleyîya Mîlî (MGK) amebî viraştiş û nê kombîyayîşî ra dima Planê Rijnayîşî erzîyabî dewre. Endamê Komîteya Merkezî ya PKKyî Cemal Şerikî derheqê nê planî de qisey kerd.
Endamê Komîteya Merkezî ya PKKyî Cemal Şerikî dîyar kerd ke dewleta tirk 30ê teşrîna verêna 2014î de Kombîyayîşê MGKyî ra dima qeraro ke bi temamî îmhakerdişî esas gêno, girewte û wina dewam kerd: “Dewleta tirk nê qerarî zî sey Planê Çalakîya Rijnayîşî eşte dewre û no plan hîna zî dewam keno. Operasyonê fehmî ke hetê îqtîdarî ra yeno meşnayîş, xeylê hetan ser de tesîr kerd; cok ra vera nê planî de reaksîyonêko lazimî bide esta, nêame nawitiş. Tevgerê Azadîya Kurd zî no het de berpirsîyarîya ke kewena ser milê ci, keno û do bikero zî.”
Şerikî va ‘planê winasî welatê ke tede têkoşînê şorişgêrî yenî dayîş de hetê rejîmê şerê taybetî ra sey stratejîyêkî erzîyenî dewre’ û wina domna: “Planê Rijnayîşî polîtîkayê faşîst, qirker û dagîrkerî yê dewleta tirkî ra cîyayêr nîyo û mabênê her di konseptan de ti cîyayî çin o. Planê Rijnayîşî bitaybetî weçînayîşê 7ê Hezîrane ra dima bi temamî erzîyayî dewre. Îqtîdarê AKP û Erdoganî ke serkewtişê HDPyî hezim nêkerd, weçînayîşî ra dima derbeyêk viraşt. Na derbe derbeya 24ê Temmuze ya û wextê derbe de hewl dayî şarî bi demagojîyî bixapênî.”Tesîrê operasyonê fehmî
Şerîkî dewamê qiseykerdişê xo de wina va: “Erdogan û AKP hewl dayî bi propoganda û ajîtasyonî Planê Rijnayîşî bi hawayo meşrû nîşan bidî. Wexto ke wina kerdênê, îdîa kerdênê ke PKK serewedarnayîş dayo destpêkerdiş. Cok ra ganî heme çîyî ra ver herkes nêyî baş bizano; PKKyî serewedaritiş nêda destpêkerdiş. Derbeya 24ê Temmuze ra dima dewleta tirk bi heme hêzê xo ser bajaranê kurdan de tahakkum awan kerd. Labelê vera propoganda û operasyonê fehmî de zeyîf ame mendiş û kesê ke aştî, seyyewbînanî û edalet waştênê vera rijnayîşo ke Kurdistan de bîyêne de bêveng mendî û bi mutabakatê AKP û MHPyî reyde pê kerdî.”Raştîya xo de Ocalanî hişyar kerdbî
Şerîkî dîyar kerd ke PKK girêdayeyê proseso ke hetê Rayberê Şarê Kurd Abdullah Ocalanî ra dîyabî destpêkerdiş mend û wina va: “Ocalanî hîna destpêkê prosesî de şarê kurd û Tevgerê Azadîya Kurd hişyar kerdbî. Herçiqas ke Ocalanî zanayêne, labelê reyna zî waştêne ke nê prosesî bimeşno. Etirîyayîşê Rayberê Şarê Kurdî raşt bî û Ocalan sey her wextî reyna heqdar vejîya. Planê Rijnayîşî hetê musteşaro ke beşdarê prosesê dîyalogî bîbî ra ame amadekerdiş. Musteşarî hewl dayo ke Ocalanî ser de tesîr bikero, labelê Rayberî nêame kayanê ci. Ocalanî waşt projeyêko samîmî yê çareserîye awan bikero, labelê îqtîdarê AKP û Erdoganî asteng kerd.”
Şerikî peynîya qiseykerdişê xo de wina va: “PKK çîyo ke keweno milê ci ser keno û nika estena şarê kurd bi xoverdayîş û bedeldayîşê PKKyî girîyeno binê temînatî. Planê Rijnayîşî hîna zî dewre de yo. Gerîla vera nê planî de Amed ra heta Dêrsimî, Behrosîya ra heta Amanosan xover dano. Ganî hêzê demokrasî hîna zaf têkoşîn bidî. Serkewtiş bi têkoşînê gerîla û hêzanê demokratan mumkin o.”