Marlis Tepe ne tenê seroka GEW’yê ye, ew di heman demê de cîgira serokê Education International (Perwerde Navneteweyî) ye jî. Ev sîwana sendîkayan a navneteweyî, mala 400 sendîkayên perwerde û mamosteyan e li cîhanê û 32 milyon endamên van sendîkayan hene. Tepe îşaret bi vê nûneriya xwe jî dike û ji Erdogan re dibêje, “Hejmarê dawî nîşan didin ku asteke berê nedîtî ya kampanyayeke tepisandinê heye: bi dehhezaran kedkarên perwerdeyê ji karên xwe hatin dûrxistin û di nava van de endamên sendîkaya Egitim Senê jî hene.”

Wê bêhtir seferber bin
Tepe vê yekê weke êrişeke dewleta Tirk li dijî welatiyê wê dinirxîne û weke binpêkirina mafê mirovan a hişk û çor bi nav dike. Tepe bi bîr dixe ku welatê Erdogan bi peymanên navneteweyî soz daye ku mafê mirovan biparêze û pê re jî azadiyên sereke û azadiya akademîk.
Seroka GEW`yê nameya xwe bi vê bangê bi dawî dike: “Ji ber vê yekê ez bang li hikûmeta we dikim ku rêya xwe bihguherîne, û tedbîrên neqanûnî yên li dijî civata perwerdekaran betal bike, û pê re jî rêzê bigire ji ferz û sozên xwe yên ji ber peymanên navneteweyî. GEW û civata perwerdeyê li tevahiya dinyayê piştgiriya hempîşeyên me yên Tirk dike. Em ê çavdêriya rewşe her daîm bikin, û heke hikûmeta we bi tepisandina karmendên beşa perwerdeyê dewam bike, em ê bêhtir seferber bikin.”

FRANKFURT