TÛFAN DÊRSIM / ANF / BEDÎNAN
Gerîlayê HPGyî Şervan Amedo ke tewrê çalakîya ke çarçeweya Hemleya Şorişgêre ya Şehîd Bager û Şehîde Ronya de 19ê Gulane de Girê Koordîne yê Çelê de vera artêşa Tirkî de ameye viraştene û 12 leşkerî ameyî kiştene û 10 leşkerî zî birîndar bîyî, bîyo qala çalakîye kerde.
Gerîla Amedî da zanayene ke înan çalakîye semedê girewtişê heyfê hemrayanê xo yê şehîdan viraşta û wina va: “Heta ke Rayberîya ma ser o tecrîd bibo û şarê ma bêro qirkerdene, ma do çalakîyanê xo bidomnî. Ma di hewteyî hadreyîya na çalakîye kerde. Ma dişmen girewtbi binê kontrolî û her gama înan teqîp kerdêne.”
Amedî qiseykerdişê xo de qala wextê çalakîye kerd û wina va: “Peynîya tetbîqatan de heme grûbî ameyî têhet. Goreyê plankerdişî ma do mewzîyê Girê Koordîne yo ke herêma Bagerî de yo, îmha bikerê. Ma verî kamerayê termale yê ke dişmenî binê girî de ca kerdî, bi teknîkê gerîlayî bêtesîr kerdî. Gama ke ma mewzîyanê leşkeran ra bîyî nêzdî vengê qîrayîşê înan ameyêne. Yewbînan de bi qirayîşî qisey kerdêne. No zî tersê înan ramojnayêne. Seba ke tersê xo yewbînan ra binimnî qîrayêne.”
Amedî va ‘leşkerêk bi ma hesîya û çalakîye dest pêkerde’ û wina qedêna: “Vengê qîrayîşê leşkeran û sîlehan têmîyan de berz biyêne. Ma da mewzîyan ro û kewtê gir. Embazî kewtî xeylî mewzîyan û şîyî meyîtanê leşkeran ser. Embazan hende ke nişka dabi piro tayî leşkerî nêrasayîbî sîlehanê xo. Çalakîya ma 15 deqeyan de qedîyaye, 20 deqeyî dime ra teyareyanê şerî derûdorî bombardûman kerd. Nêzdîyê mewzîyanê leşkeran ser o zî bombayî varnayî. Beno ke înan dayo mewzîyanê xo ro zî. Seke ma pratîkanê verênan ra zî zanê seba ke yew embazî şehîd bikerê, danê leşkeranê xo ro zî. Gama ke artêşa Tirkî derûdor û leşkerê xo bobardûman kerdêne, ma resayîbî cayanê biasayîşan.”