Vera hêrişê dagîrkerîye yê artêşa Tirkî û çeteyanê ci de Vakur û Rojhelatê Sûrîye de xoverdayîşêko destanî yeno nîşandayene. Artêşa Tirkî û çeteyanê ci heta nika nêşêna xoverdayîşê QSDyî derbaz bikero û netîceyê pêrodayîşan de tena rojêk de 75 dagîrkerî kişîyayî, 19 dagîrkerî birîndar bîyî û 7 tanqî ameyî îmhakerdene.

Vera artêşa Tirkî ke bi teyara, tanq, top û çeteyanê xo hêrişê Vakur û Rojhelatê Kurdîstanî kena de xoverdayîşê destanî yê QSDyî 6 rojî yo dewam keno. Heta nika derbê girdî dîyayî artêşa Tirk û çeteyan ci ro. Artêşa Tirkî tena eşkena bi teyarayan bombarduman bikero û top û hewanan bierzo herême.

Artêşa Tirkî çi Girê Spî û çi zî Serêkanîyê de heta nika misqalêk zî aver nêşîya û bi seyan leşker û çeteyê Tirkan kişîyayî. Artêşa Tirkî ke nêşêna vera xoverdayîşê QSDyî derbaz bikera, hêrişê sîvîlan kena û heta nika bi desan sîvîlî qetil kerdî.   

Çarçewaya xoverdayîşî de Serêkanîyê û dormeyê ci de pêrodayîşê giranî benî û tena rojêkê de 75 çeteyî ameyî kiştene, 19 çeteyî zî birîndar bîyî û 7 tanqî ameyî çinkerdene. Şervananê QSDyî meterîsanê şerî de qisey kerd û dîyar kerd ke ê do heta ke Vakur û Rojhelatê Sûrîye serkewenî, xoverdayîşê xo bidomnî.

Ma do hesabê Hemra Hevrîn Xelefe bipersî

Sekretera Pêroyî ya Partîya Ameyoxî ya Sûrîye Hevrîn Xelefe hetê çeteyanê DAÎŞî ra bi hawayo hovane ameybî qetilkerdene. Fermandarîya Pêroyî ya YPJyî îzehetêk da û Hevrîn vîr arde. YPJyî dîyar kerdo ke ê do bi hawayo gird cewab bidî şehadetê Hevrîne û wina dewam kerdo: “Ma keye, şar û heme merdimîye rê serweşî wazenî. Ma do bi ruhê xoverdayîşê Ronas Erebe, Ronahî, Nûpelda, Sîyajîne, Silava, Rêvane, Sorxwîne, Denîze û Nêrgîzan wayîrê vîrardişê Hevrîne bivejyî. Ma qerardar î seba bîyayîşê cewabê şehadetî, ma do têkoşînê xo gird bikerî û serbikewî.”

Eşîrê Ereban zî tewrê seferberîye bîyî

Heto bîn de şêx û rîsipîyanê Ereban îzehetêk da û da zanayene ke ê tewrê seferberîya pêroyîye bene. Serkêşanê Ereban dîyar kerd ke ê bi 50 hezar şervanan beşdarê xoverdayîşî benî û wina domnayo: “Ma heme hetê QSDyî de yê. Ewro ma do vera dagîrkerîya Osmanî de xover bidê. Ma amade yê ke 50 hezar şervananê ciwanan ê qebîlayanê Ereban yê Vakur û Rojhelatê Sûrîye tewrê Hezanê Sûrîyeya Demokratîke bibê û vera dagîrkerîya Osmanî ya barbare û çeteyanê aye de vinderê. Ma veng danî fermandarîya pêroyîye ya QSDyî ke wa her vîncewa erdê ma dagîrkerîya Osmanîyan ra bixelisnê. Tarîx do nê çi xo vîrî ra nêkero û gonîya şarê ma ercan nîya.”

5 dewletî do sîlehan nêroşî Tirkîya

Vera hêrişanê dagîrkerîye yê artêşa Tirkî de dewletanê mîyanneteweyîyan ra zî reaksîyonî her ke şono zêde benî. Wezîra Pawitişî ya Fransa Florence Paylye daye zanayene ke Fransa do êdî sîlehan nêroşo Tirkîya. Parlye îzhetê xo de wina vato: “Fransa ya ke pawena ke Tirkîya operasyonê Vakur û Rojhelatê Surîye vindarno, sîlehê ke do çarçeweya operasyonî de bêrê bikarardene nêdo Tirkîya û heme projeyê rotişê materyalanê şerî dayo vindarnayene.” Seke yeno zanayene verê cû zî Fînlandîya, Norveç, Hollanda û Almanya eynî qerar girewtbî.  AMED