Vînayişê şagirtan de vengayey nêvirazya. Ez bawer kena ke derfet bibêy dibistanîy abêy, ê biwazê biwanê zehfê. Hêvî û omidê ma bi ziwanê zikmakî mafê perwerde bêro dest fînayiş. A semedra vanê ma zehf bixebetyime. Bi ziwanê zikmakî perwerde zey şitê dadî (maye) ma ma rê helal o.
La her çiqas helal bo zî semedêko destê ma ra amewo girewtiş lazimo ma tekoşîna cey zêdera bidim. Nê mafê xo bi dest fînim. Vatişê verînan o: “Maf nîno dayiş yeno girewtiş”. Ma zî nê mafê xo bigerime. Ma verpersîya xo bica biyarime. Ma bizanim ziwan bi şixulnayiş cuyen, bi şuxulnayiş zêdyen, bi şuxulnayiş dewlemend beno.
Yew aqilmendî ra persen: “Cîyayî ya mal û zanyarî çiya?” Vano: “Mal çiqas ti xerc bikerê kemî beno. La zanyarî çiqas ti xerc bikerê zêdyeno.” Ziwan zî çiqas ti bi xebetnê endêk dewlemend beno.
Lazimo ma kêyê xo de bikê û kulfetê xodire bi ziwanê zikmakî qisey bikerime. Ma kûçe û kolananê xo de bi ziwanê xo qisey bikerime. Dew, qeza û şaristanê xo de bi ziwanê xo qisey bikerime. A herî girîng (muhîm) ma sazîyanê xo de bi ziwanê xo qisey bikerime. Ma dayiş û girotişê xo bi ziwanê xo bikerime. Wexto ma nê mafê xo û verpersiya xo bica biyarime qada civakî de ziwano zikmakî yeno qiseykerdiş. Çi beno wa bibo ke biko qada civakî verniya cey de ti bende nêmanen.
Ewro roj, nê çiqas vîrê ma de nêzana. Rojêka şaro kurd na erdnîgarî ser 3-4 cenazanê xo defin nêkero çinya. Roj qezayeke de kêre teberkewtiş qedexe kenê. Bi hezaran polîsê taybet ê şerî bi wesayîtanê şerî yê herî giranan bi tanq, kirpî, toma, helîqopter û balefir (teyar)ê şerî kûçe kolanan û koyanê ma gulebaran kenê. Cuyayişo fizîkî xeteredo raşta. Ma xo ver danê. La cuyayiş bêziwan nêbeno.
Nesip GULTEKÎN