Tepişteyanê sîyasî 4ê Adar de verra tecrîdê Rayverê Şarê Kurd Abdullah Ocalan û serva qebûlkerdişê waştena xoserî yê şarê kurd destpa nûmayişê grevê veyşanî kerdî. Badê nûmayiş binlingkerdişê heqan û zextê îdareyanê girotxaneyan kî jêdîyayî. Tenya jû aşma peynî de bi seyan tepişteyî sirgûn bî, qedexeyê zêdîyayî. Nê cayan ra jew kî girotxaneyê Erzîngan o. Tepişteyê bi nameyê Zeynel Gul ke verîya 15 rojan tehlîye bi derheqê binlinkerdişê heqanê tepişteyan de qisey kerd.
Hurendîya 8 kesan 20 kesî manenê
Gul’î da zonayen ke, badê nûmayişê grevê veyşanî yê tepişteyan kerdenê kêfê yê îdareyê girotxane zî bê jêde û wina qisey kerd: “Rojanê peynî de îdareyê girotxane bin nameyê geyrayişî de tepişteyan tacîz keno.” Weşan, mektûb û pirtûkê ke tepişteyan ra yenê zaf herey danê. Fîleyê voleybalî ke awlûde bî zî wedarnay. Reyna malzemeyê kirtasîye yê ke teber ra rûşîyenê nêdanê.” Zeynel Gul’î vist vîrî ke giroteyê nêweş nînê dermankerden. Gul’î da zonayen ke rojanê peynî de 33 tepişteyê sîyasî surgûnê girotxane bî wina va: “Herzewbîn kesê newe zî tepêşîyayî. Nayî ra girotxane de ca nêmendo. Qoşixanê 8 kesî de 20 kesî manenê.
Qedexeyê çapemenî
Binlingkerdişê heqan bi girotxaneyê Erzîngan ra bi sînor nîyê. Xêlê girotxaneyan de goreyê îdareyê girotxane polîtîkayê cîya yenê ramiten. Qezaya Riha Xelfetî de zî rojnameyê Azadîya Welat û Ozgur Gundem amey qedexekerden. Dozgerê girotxane qerarekê kêfî û ferdî da û tepişteyan rê dayişê rojnameyan tomet kerd. Îdareyê girotxane kî no qerar sereraşt kerd.
Qontrolê viran
Heto bîn ra girotxaneyan de jew kerdenê kêfî û bêhiqûqî zî qontrolê viran o. Pawitox û temsîlkara Tora ceniyan yê Komeleya Civakê Sivîl Ezgî Dûman da zonayen ke, wextanê peynî de girotxaneyan de kerdenê geyrayişê viran jêde bi. Dûman vist vîrî ke, no kerden, rîwalê gumanê sûcî nê, rîwalê jêdekerdişê serdestîya camêrdan ya ser cenîyan yeno ferzkerden. Dûman veng da pêrokîn tepişteyanê cenî yê ke raştê qontrolê viran yenê serpirodayişê rêxistinanê cenîyan û heqê merdiman bikerê û gerreyê sûc bikerê.
NAVENDÊ XEBERAN