Bi hezaran tepişteyê sîyasî ke girotxaneyanê Tirkîye de manenê, bi îşkence, tehdît û kerdenanê bêhiqûqî ra rî bi rî yê. Girotxaneyê Xarpêt de zî, 20 cinî raştê îşkence ya komeke ke ci ra vanê "Tîma A" amey.
Tepişteyan ra Nazli Songul ke Girotxaneyê Xarpêt Tîpê T de manena, bi mektûbeke hayr ant îxlalê heqan ser. Songul ard ziwan ke 9ê Sibata 2017î de, a bi embazanê xo Sudan Guven, Yaprak Taşçi, Hayat Akyildiz, Songul Bagatir û Ahiret Turan Girotxaneyê Tîpê E yê Erzirom ra, sirgûnê Girotxaneyê Tîpê T ê Xarpêt bîyê.
Songul mektûba xo de ard ziwan ke înan rê şîdeta fizîkî bîya û nê detayan da: “Girotxaneyê Xarpêt de bi sebebo ke ê nêkewtê nîzama hûmartişî raştê şîdeta Tîma A yê 20 kesan ameyê. 12 rojan ra dima rapora weşîye amê girewtiş. La rixmê rapora dadgehî zî, dawa bênetîce mend. Rîwalê nêkewtişê nîzama hûmartişî û 21ê Adare de adir wekerdişî ma rê 3 aşmî cezayê pêdîyayîşî ame birnayen.”
Nezdîbîyayîşê tecrîdî
Tepişte Nazli Songul vist vîrî ke nezdîbîyayîşê îdareyê Girotxaneyê Xarpêt, nezdîbîyayîşê tecrîdî yo. Kerdenê bêhiqûqî bi nînan ra sînordar nîyê. Goreyê vatenanê Songul, qoxişan de kamerayî ameyê bicakerdiş. Tepiştey nêrişîyenê revîrî, awa serd û germ nêdanê tepişteyan.
Girotxane de destûr nîno dayen ke tepiştey pê bivînê. Spor û aktivîteyê sosyal çin ê. Çîyê ke malbatî teber ra rişenê nêdîyenê tepişteyan. Qelemê boyaxî nêdanê domanê ke qoxişan de yê.
Îxlalê heqan ramenê
Hemseroka DBP ê Qersî yê verî Şengul Mehmetoglu ke 27'ê Kanûna 2016’î de amê tepiştiş, zî vist vîrî ke bi sebebo ke qoxişan de ca nêmendo, tepişteyê cinî erdî de rakewnê. Mehmetoglu ke wedarîya nêweşxane, bi hewayê kelepçekerdî amê dermankerdiş. Mehmetoglu, vist vîrî ke tepişteyê cinî ke qoxişa D-6 de yê dûştê binlingkerdişê heqan destpa girevê veyşanî kerdbî. Rixmo ke girev qedîya zî, îxlalê heqan ramenê.
XARPÊT