CRAye 22ê nîsane de roja Rojnamegerîya Kurdan de, Amed de ameye awankerdiş. Cemîyet bi serran o ke herême de xebate dano meşnayîş û 400 ra zêde endamê xo estî. Cemîyet her tim bî vengê rojnamegerê ke ameyî tepiştiş, tewqîfkerdiş, qetilkerdiş û rastê hêrişan ameyî. Babete ser o Hemserekê Cemîyetê Rojnamegerê Azadan Hakki Boltanî qisey kerd.
Cayê ci yê taybet esto
Boltanî va ‘Kesê ke vanî qey bi morkerdişê berê cemîyetî do xebatê ci bivinderî, xo xapenênî’ û qiseykerdişê xo wina domna: “Padîyayîşê komeleyan ra ver, Serekomar Recep Tayîp Erdoganî qiseykerdişê xo de vatbî ‘Tirkîya heta nika hende azade nêbîya.’ No vatişê Erdoganî vatişêk trajîkomîk o; çimkî cayêko taybet yê cemîyetî esto. Roja ke cemîyeta awan bîyo ra nata, seba rojnamegeran xebetêko taybet dayo meşnayîş û 400 rojnamegerî endamê ma bîy. Mîyanê nê rojnamegeran de, rojnamegerê ke Cizîr, Sûr, Gever û Nisêbîn de şert û mercanê tewr zehmetan de mendî zî estbî.”
Hîna zî endamê ma yî
Boltanî qiseykerdişê xo de bale ant ser vatişê Wezîrê Karê Zereyî Suleyman Soyluyî ke vatbî ‘Ma 370 komeleyan pada. Ma pada û eke eşkenî wa biakerî’ û qiseykerdişê xo wina qedêna: “No vatişî ver qerarê padayîşî meşrûîyetê xo vînî kerdo. Şima eşkenî cemîyetê ma padî la ma do xebatanê xo bidomnî. Ma ti hawayî xebatê xo yê rojnamegerî ra tepîya game nêerzenî. Ma do goreyê morê înan nê, goreyê heqîqetê xo hereket bikerî. Beno ke cemîyetê ma ameyo padayîş, la hema zî rojnamegerî endamê ma yî. Ê do waran de xebatê xo bidomnî û ma zî wayîrê înan bivejyî. Ma do kar û xebatê dewlete ra nê, ma do kar û xebatê xo reyde eleqeder benî. Ma do nika ra tepîya hîna zafêr wayîrê 400 rojnamegeran bivejyî. Seba ameyoxêko azade û cemîyeto ke hîna biçalak bêro awankerdiş, ma do têkoşînê xo bidomnî. Ma sozê înan danî.”
DÎHABER / AMED