Serekê Platformê Komeleyanê Başûrrojhelat û Rojhelatî Abdulhakîm Daşî va “Çîyê ke 12 êlule de nêameyî viraştiş, ewro yenî viraştiş; cok ra ma do vajî nê.” Serekê DÎAY- DERî Ekrem Baranî zî va ‘no qanûno bingeyî eksê Peymana Medîne yo.’
Tirkîya de 16ê nîsane de do referandûmêk bêro viraştiş û nika zî prosesê referandûmî yeno cuyayîş. No proses de cepheyo ke vera hukmatî de vano nê, her ke şono hîra beno. Heta nika sîyasetmedaran ra heta hunermendan, roşnvîran ra heta kedkaran, akademîsyenan ra heta wendekar û mamostayan, zaf hetî aşkere kerdî ke do referandûm de vajî nê.Na çarçewa de Serekê Platformê Komeleyanê Başûrrojhelat û Rojhelatî Abdulhakîm Daş û Serekê Komelaya Piştîdayîş û Hetkarîdayîşê Alimê Dînî (DÎAY- DER) yê Stenbolî Ekrem Baranî qisey kerdî.
Dîktatorî anî
Daşî va ‘demokrasîya ke ma qala ci kenî wina nîya, cok ra ma do vajî nê’ û qiseykerdişê xo wina da domnayîş: “Ziwanê kurdî û bi ziwanê dayîke perwerde seba kurdan waştişêko elzem o, labelê hetê hukmatî ra yeno wedarnayîş. Bi îdareyê herême reyde eleqeder çîyêk çin o, herinda ci de sîstemê merkezî xurt beno. Seba kurdan statu yan zî şinasekerdişêk çin o. Reyna mefhûmê tirkîtî nîno wedarnayîş û bêxera tirkîtî ti nîjadê bînî nînî naskerdiş. Xora Serekkomar ewro ti quralî nêşinasneno û bi hawayo fîîlî sîstemê Serekkomarî dano meşnayîş. Cayo ke hende ters tede hakim o de ti meşrûîyetê nêyî çin o. Wextêko winasî de eke ya bivejîyo, o wext do kaos hîna zêde bibo. Seba ke demokrasîya Tirkîya derbe nêwera ganî her kes vajo vera no qanûno bingeyî de vajo nê.”
Heqê her kesî esto
Baranî zî va ‘qiseykerdişanê xo de tim Peymana Medîne sey finak nîşan danî; o wext cihû û muslumanî pya cuyayênê’ wina domna: “Ewro felsefeya ke şaranê Rojhelato Mîyanên ser de ferz kenî, qederê şarî nîyo. Tena kurdî nê, ereb, tirkmen, asûrî û suryanîyî zî eşkenî pîya bicuyî. Labelê çi heyf ke Rojhelato Mîyanên de bin nameyê îslamî de şarî çinî yenî hesibnayîş. Goreyê Quran û bawerîya ma heq û huqûqê her kesî esto. Mîyanê nameyê AKPyî de ‘edalet’ esto, labelê şaran ser de polîtîkayê înkar û îmha yenî meşnayîş. No nîno qebulkerdiş. Ganî her kes vera zulmî de bivindero.”
STENBOL / DÎHABER