Rayverê Şarê Kurd Abdullah Ocalanî pêdiyayişê bi birayê xo Mehmet Ocalanî de vengê çarekerdişî da hikûmeta AKP. Partîyanê çepger û sosyalîst paşt day vengdayişê Ocalanî û hikûmet ra waştî ke goş bidê.
Vatiş û vengdayişê Ocalanî sîyaseta pêroyî de veng da. Ocalanî veng da dewlet ke seba çarekerdişê meseleya kurd mesûlîyetê xo bîyaro ca. Seba na vengdayişî çormeyanê hera ra destegî yenê. Temsîlkaranê partîyanê çepger û sosyalîst zî destegê xo aşkere kerdî. Qiseykerdoxê Partîya Kiho û Ameyişê Çepî (YSGP) Nacî Sonmezî aşkere kerd ke tenya Ocalanî ra xeber girotiş bes nêkeno. Sonmezî vist vîrî ke neyra tepya zî seba ke Tirkîye de herb, pirodayişî û merdişî vinderê Ocalan rolekê gird kay keno û waşt ke reyna açarnîyo muzakere û dîyalogî.
Ganî dewlet gam bierzo
Nacî Sonmezî da zonayen ke seba vindernayişê merdişan wezîfeyê sifte yê dewlet o û va: “Dewlet raveyşîyayişeke qijkekî zî bi polîtîkayanê tîvarî berteref kena. La zey ke ma heta nika va, na mesele bi polîtîkayanê tîvarî hal nêbena. Bi demokrasî, heqanê esasî û azadîyan hal bena. Nayî ra ganî dewlet mesûlîyetê xo bîyaro ca û gam bierzo.” Sonmezî vist vîrî ke pêdiyayişê Ocalanî gamek o û aşkere kerd ke zey partî iyê dê zî mesûlîyeto ke kewno înan ser dê bîyarê ca.
Seroka Partîya Emegî (EMEP) Selma Gurkan zî vist vîrî ke înan verîya coy zî derheqê mesele de veng dabi hikûmet. Gurkan hayr ant qewimyayişanê Rojhelatê Mîyanî û Sûrîye ser û damûsna ke Tirkîye de çi qe hewcedarîyê haştî û çarekerdişî esto. Selma Gurkan zî pêdiyayişê bi Ocalanî zey gameke muhîm dî û va nika zî dorê eştişê gamanê bîn o. Gurkan va tenya jew şert ê çarekerdişî esto û va, ganî waştişê şarê kurd ganî çarçoveyê heqanê têdûşt de ca bîrê. Ser na esasî çarekerdişo ke destpa bikero do xîzmetê haştî bikero.
Ganî qîmetê mesaj bizanîyo
Derheqê vengdayişê Ocalanî de Seroka Partîya Hereketê Emegdarî (EHP) Sîbel Ûzûn zî aşkere kerd ke reyna bîn seba vindernayişê herbî û çarekerdişê sîyasîya demokratîk mesaj amê dayen. Ûzûn da zonayen ke ganî qîmetê mesaja ke Ocalanî ra amê bizanîyo û wina va: “Ganî kayyûm û pêrokîn şiklê bêhiqûqî biqedîyê. Polîtîkayê AKP û vatişê Erdoganî vernîya na pêvaco gênê. Nayî ra ganî ma çarçoveyê na mesaj de çormeyê mûxalefeta sîyasî ya demokratîk rêxistin bikerê û hayr biancê nayî ser.”
Serokê Partîya Şoreşger Ûfûk Gollu vist vîrî ke bi viraştişê pêdiyayinî waştenê 50 kesan qebûl vîniya û aşkere kerd ke Ocalanî meseleya kurd de îşaretê çarekerdişê demokratîk kerdo. Gollu hayr ant vatişanê Rayverê Şarê Kurd Abdullah Ocalanî ser û wina va: “Ocalan vano wa dewlet 2 sermîyanan birişo na mesele 6 aşman de hal bena. Hona zî îşaretê çarekerdişî keno, no îradeyekê muhîm o. Cayo ke 6 aşman de mesele hal bibo, rixmê nayî nêçarekerdişî de israr tewrê dewlet damûsneno.” Ûfûk Gollu da zonayen ke meseleya kurd de ê paşt danê çarekerdişê demokratîkî û va, tîya de wazenime ke şert û mercê şarê kurd û rayverê netewî bîrê raştkerdişî û wazenime ke reyna açarnîyo pêvacoyê muzakere.
Azayê Desteya Serokanê Partîya Azadî û Paştdayenî (ODP) Alper Taşî aşkere kerd ke sebebê bi aqilane yê herbo ke bi serrano rameno nêmendo. Taşî aşkere kerd ke bêvengkerdişê tifingan û vernîya akerdişê pêvacoyê newî muhîm o û waşt ke vengdayişê Ocalanî zî bibo wesîleyê pêvacoyekê newî. Alper Taşî va na mesele hal bena û va, eke hal nêbo do açarnîyo herbekê bi serran. No rijnayişekê yo. Taşî aşkere kerd ke şarê Tirkîye welişnayişî heq nêkena û va, înşakerdişê haştî, ciwîyayişeke bi rûmet û têdûşt destanê ma de yo. Meseleyekê hal nêbo nîya.
Ganî dewlet goş bido
Seroka Partîya Sosyalîst ya Reyna ra Xelesnayişî (SYKP) Tulay Hatîmoglû zî vist vîrî ke meseleya kurd endî tenya meseleya Tirkîye nîya, açarnîya meseleya Rojhelatê Mîyanî. Hatîmoglû va na mane de ma vengdayişê Ocalanî muhîm vînenê û gênê cidî û waşt ke muxetabî zî bigîrê cidî. Tulay Hatîmoglû vist vîrî ke na pêvacoyî de Kurdistan de xêlê însanan weşîya xo kerd vinî û va çarekerdişê meseleya kurd do raya demokratîkbîyenî zî akero. Hatîmoglû veng da sermîyananê dewlet û va: “Ganî goş bidîyo vengdayişê Birêz Ocalanî. Ma endî nêwazenê welatekê bîyo gola gonîn de biciwîye.
DÎHA/STENBOL