Hemserokîna Konseya Rayverîn ê KCK verîya 3 rojan gamekê bîn ya tarîxî eşt û seweta çareseriya meseleya kurd deklarasyonekê eşkere kerd. KCK aşkere kerd ke, înan ser vengdayişê tayî çormeyanê dewlet, HDP û çormeyanê demokratîk ser o no beyanname kerdo hedre û va ‘eke dewleta tirk sozê qandê çareserîn bido, ê hedreyê gaman bierzê. Badê deklarasyonê KCK, heme çimî açarîyay hikumeta AKP û dewleta tirk ser. Seba deklarasyonî çormeyanê hera ra poştayiş ame.
Hemserokîna Konseya Rayverîn ê KCK bi deklarasyonekê çareserînê demokratîk, fina bîn niyetê xo yê rind ê qandê aştî damûsna. KCK sernî de eleqe ant hewldayen û xebatanê Hereketê Azadîyê Kurd ê seba çareserînê siyasî ê 20ê Adara 1993 ra na kişt ser û ard ziwan ke, rojanê peynî de, heveyê dewletan, heveyê partiyanê Başûrê Kurdistanî, çormeyê demokratîk ê Tirkiye û HDP veng dayo înan û cok ra jî, înan qerar dayo, fikr û niyetê xo eşkere bikerê.
Aşkerekerdişê niyetê rind o
KCK vist vîrî ke Rayverê Şarê Kurd Abdullah Ocalan û Hereketê Azadîyê Kurd hertim hetkarê çareserînê demokratîko û qandê ena waştenî, peyser antişê gerîla ra pîya xeylê gamê ver çiman eştê. Hemserokîna Konseya Rayverîn ê KCK da zanayiş ke eke dewleta tirk û hikumeta AKP peyniyê siyasetê qirkerdin biyaro û soz bido ke, iyê seba çareserîn gaman bierzê, hereketê azadiyê kurd zî do gamanê hewce bierzo. KCK zey şert zî, şiyayişê heyetê HDP û meclîsa Tirkîye yê Îmrali û ageyrayişê dewleta tirk ê pêkerdişê Dolmahçe ardî ziwan. Hemserokîna Konseya Rayverîn eleqe ant rol û muhîmîyê Rayverê Şarê Kurd Abdullah Ocalan’î ser û vat: “Gerek verniyê Rayver Apo abîyo. Rayver Apo bişero hereketê xo û bi xeylê hetan ra pêdiyayişan virazo.KCK ard ziwan eke no deklarasyon adirbirnayiş niyo, la belê aşkerekerdişê niyetê rind ê seweta çareserî yo.
Goş bidê vengdayişî
Seba deklarasyonê KCK xêlê çormeyanê azadîwaşt û demokratîk ra destegî yenê. Heyetê Îmrali derheqê deklarasyonê seba çareserî yê KCK de kombiyayiş viraşt û dewleta tirk ra wast ke, goş bido vengdayişê KCK. Heyeta Îmrali yê HDP jî, deklarasyonî sero kombiyayiş viraşt. Azayê heyetî ra Sirri Sureyya Onderî kombiyayişî de qisey kerd û eleqe ant muhîmînê deklarasyonê KCK ser. Onderî deklarasyonê KCK seweta aşitî û çareserînê siyasî zey firsetekê gird hesibna û dewleta tirk ra wast ke, goş bido vengdayişê KCK.
Vengê haştî berz bikerime
Partiyanê Siyasî yê Demokratîk ke deklarasyonê KCK, zey gama tarîxî hesibnay û dewleta tirk û hukumetê AKP ra wastî ke cewab bido deklarasyonî. Vatoxanê HDK ra Gulîstan Kiliç Koçyîgît deklarasyonê KCK, zey gamê rind û muhîm ê qandê aştî hesibna. Kiliç Koçyîgît dewleta tirk wast ke, xo nêweşînê tersê kurdan ra bixelesno û gamanê lazim çekiro. Koçyîgît şaranê Tirkiye ra jî wast ke qandê aştî vejiyê kûçeyan, vengê aştî û çareserîn berz bikerê ke, dewleta tirk û AKP mecbûr biternê ke gaman bierzo.
Tirkîye açaryayo cayê veşnayî
Seroka Pêroyin ê EMEP Selma Gurkan zî deklarasyonê KCK, seweta çareserîn, zey firsetê gird hesibna. Gurkan veng da AKP û wast firseto ke bi deklarasyonê KCK vejiyayo werte, rast bixeftino û gamanê lazim çekiro. Gurkan eleqe ant komkiştena Dîlok ser û vat: “Ena komkiştena badê deklarasyona KCK tesadufî nîya. Bi ena komkiştena waziyeno verniyê çareserîyê bigeyriyo. Coka lazimo ena êriş ra ders bîro vetiş.” Azayê Konseyê Serokîn ê ODP Alper Taş jî desteg da deklarasyonê KCK. Taşî wast ke kêmasîyanê verînan ra ders bîro girewten û vat: “Tirkiye û mintiqayê ma pêrin açariyayo zey cayê veşnayî. Gerek dewlet raya çareserînê demokratîk akero, tecrîdê ser Ocalan’î hewado. PKK zî çalekîyanê tifîngîn virado.”
Redkerdişê Ocalanî, redkerdişê haştî yo
Seba deklarasyonê KCK jew destegê bîn zî bloqê aştî ra ame. Vatoxanê Bloqê Aştî ra Bahadir Altay zî deklarasyonê KCK, zey gama muhîm hesibna û vat: “No deklarasyonî ra belû beno, seba çareserî problem dewlet bi xo ya. Ocalan seweta çareserîn wayirê tesîr û rolê girdo. Gerek verniyê ey abiyo.” Altayî aşkere kerd ke seba haştî redkerdişê destegê Ocalanî, redkerdişê haştî yo û va, seba haştî poştdayişê herkesî ganî bîro qebûlkerden.
Hemseroka pêroyin ê DBP Sebahat Tuncel zî mîtîngê Mêrdînî ra paşt da deklarasyonê KCK û zey firsedê gird ê qandê çareserîn hesibna. Tuncel dewleta tirk ra wast ke, goş bido deklarasyonî û ageyro maseyê çareserîn ser û verniyê kaosî bigiro.
NAVENDÊ XEBERAN