Tayê Dersîmizê ma qeyta baqil nêbenê.
Ya kî hora wastena xo na wa û xo xorê dismenîye kenê.
Na waxtê ma de honde cayîlîye û xo xorê dismenîye bêzonayîs nêbena.
Serokwezîrê tirkî derheqê tertelê Dersîmî de çîye vat, desinde tayê Dersîmizan darîye sone kerde danê mîtolojîyê xoro.
Serookwezîrê tirkî hata ewro xêlê çîyê rindî vatî. Eyra avê qeyta jû sîyasetvanê tirkî nî meseleyî nêardenê ra zon. Na jû raştîya.
Hama bêrê bivînê ke onca serokwezîrê tirkî binê nî vatîsanê xo pirnêkerd. Çiyê rindî vatî, hama polîtîka kane û qilêrinê ramite.
Reye bîyarîme xo vîrî. 2005 de RTE Amed de kî tertelê kurdan, xeta û guna dewleta xo qebul kerde.
Dima se kerd? Ma pêro zoneme, tertelê kurdan hata roza ewoyene devam kerrd.
O vano û vêreno ra sono, mesela ma kî hora serokwezîro tirk nîyo.
Mesela ma tayê Dersîmiz yê.
Nî Dersîmizî tertelê xo sero qesey nêkenê, mektuve kamî nusna aye sero qesey kenê û ebi na tore Seyîd Rizayî rê wayîr vejînê, Baytar Nurî kenê gunekar.
Vajîme ke Seyîd Rizayî na mektuve nênusna, Baytar Nurî nusna, se beno.
Vajîme ke jûyê bînî nusna, na marê çi ana?
Kamî ke nusna, nusna û rind ke nusna.
Ma ke vame na mektuve Seyîd Rizayî nênusna, jûyê bînî nusna, nîya tertelê Dersîmî bi heqe vîneme, teyna kistena Seyîd Rizayî nahletî keme.
Gosdarmenî na wa îşte.
Tayîne hora hata nika Baytar Nurî rexne kerdenê û vatenê ‚o mara nîyo.’
Nika Seyîd Rizayî kenê cayîl û tarîxê xo kenê xirave nî gosdarmeyî.
Dewleta tirkî tertelê ma kerdo?
Kerdo.
Dewleta tirkî pîze cuwanikanê Dersîmî de domonê soykekî bi sungî nêkiştî?
Kiştî.
Çena Mistê Korî, Sabîha Gokçen welatê ma bomba nêkerd?
Heya kerd.
Çenekunê ma yê ozevu xo tir û kasu ro nêest ke, era tecavuzkaran dest nêkuyê?
Heya, hen kerd.
Eskeranê tirkan cenî û çenekanê marê tecavuz nêkerd?
Heya, kerd.
Na dewleta gonewere domonê ma mara nêguretî û nêberdî?
Heya berdî.
Na dewleta gonewere bi hezaran însanê ma surgin nêkerdî?
Heya kerdî.
Ez hen zonen ke kes kes nî pers û cewaban rê îtîraz nêkeno.
Pekî eke hen yo na mektuve nika ça honde bîye muhim.
Ha sima rê gosdarmîye û gosdarmenîya tayê dersîmizan!