Grevê vêsaniye tarîx de zaf cayan de amê virastene.
Hîndîstan de Mahatma Gandhî mavênê serranê 1930 û 1940 de xêle reye kewto grevê vêsaniye.
Gandhî wastenê ke qomê xo herbê çekdarîye ra dûrî vindo. Peyniye de qomê Hîndîstanî wastena Gandhî arde hurêndî. Gandhî na semed ra bî sembolê pêrodayîsê haştiye.
Tarîx de jû biyayîso muhîm kî Fransa de virajiya.
Ebi name Louis Lecoin jû mordemekê fransizî verva eskeriye şiyayene grevê vêsaniye virast. Hata o waxt Fransa de gune herkes bişiyenê eskeriye. Louis heqa redkerdene wastenê. Nika naye ra vanê ‘Vijdanî redci.’ Louis 1961 grevê vêsaniye virast û roza 22îne na gervê xo qedena.
Çike serokwezîrê î waxtî yê Fransa, Georges Pompidou wad kerd ke qanun seweta heqa redkerdene vezo.
Hama Pompidou na wadê xo honde nejdîde hurêndî nêard.
Na semed ra Louis onca hukumat ebi grevê vêsaniye tehdît kerd. Naye ser hukumatê Fransa 1963 de qanuno viren vet û mordemê ke rîwalê redkerdena eskeriye ra kerdî bî hepis, verdayî ra.
Xêle dugelunê Avrupa de însanî şîkînê karê eskeriye redkerê û esker meşerê.
Kurdan zî grevê vêsaniye serranê 1980 de hepisxanê Amed de naskerd. Ora tepiya leto jede hepisxanan de Kurdan na numayîs seweta wastîsanê xo ard kar. Çike dewleta zordar û gonewere seweta heqan qewxa rê zovîna rayî nêverdayî bî.
Hepisxanan de mahkuman weşiya xo seweta guretena heqanê xo yê însaniye este wertê adirî. Bi na tore qewxa mahkuman bingê hereketê serbestiye est.
Ceremê xo zaf berz bî, hama mêresode girs zî peyê xo de verda. Qadroyanê PKK ebi grevê vêsaniye ro da weşiya merde yê Kurdan. A roze ra na het Kurdî sareberz kamiya xorê wayîr vejînê.
Kurdan grevê vêsaniye jê hazetede qewxa û heqe guretene xêle reye ard kar.
Nika grevê vêsaniye seweta Kurdan onca rojdem derê.
20 rojî ra avê hepisxanê Amed de mebusa kurde Selma Irmak dest kerd grevê vêsaniye. Naye ra dime hepisxanan de grevê vêsaniye bî hîra. Roz bi roz tenena jede mordemî hepisxane û teverê hepisxanan de kunê grevê vêsaniye. Koma BDP zî ebi 2 rojî grevê vêsaniye poştî dê numayîs.
Nika zî Avrupa de grevê vêsaniye virajîne. Jûyê na asme, roza posemiye, suka Fransa Strassbourg de 15 Kurdan dest kerd numayîs. Armancê xo ‘Ocalanî rê serbestiye, qomê kurdî rê statuyo siyasî’ yo.
Numayîskarî ma peroyîne ra poştî wazenê. Teyna seweta xo weşiya xo wertê adirî nêerzenê. Kam ke wazeno sebest bo, gune poştî numayîskaran do. Qeyta jû qomî bê bedel serbestiya xo nêgureta û netev nêbiyo.
Sîyasetê Tirkiya de kulturê haştiye çîno. Gorê mi, ma gune bi hezaran na grevê vêsaniye kume. O waxt belka kes vengê ma hesneno.