Bi nameyê tepişteyanê PKK û PAJKî Denîz Kayayî vat ke “xoverdayîşê grevê vêşanîye ke ma seba azadîya Rayberîya xo dayo destpêkerdene do dewam bikero.” Heto bîn ra Hepisxaneyê Tîpê Tyî yê Amedî de zî 5 girewteyanê bînan dest bi grevê vêşanîye kerd.

Hemsereka KCDyî û Parlamentera HDPyî Leyla Guvene seba ke bale bianco tecrîdê Rayberê Şarê Kurdî Abdullah Ocalanî ser 8ê teşrîna peyêne ra na het dest bi grevê vêşanîye kerdo û na çalakîye xeylî hepisxaneyan de bêwext û bêdore dewam kena.

Bi nameyê tepişteyanê  PKK û PAJKî Denîz Kaya derheqê pedîyayîşê Rayberê Şarê Kurdî Abdullah Ocalanî de eşkerayîyêk daye. Eşkerayîye ra tayî cayî wina yê:”Îktîdaro faşîst yê AKP-MHPyî hemverê xoverdayîşê ma de polîtîkaye taybetî yê şerî vistî dewre. Hukmato ke vera xovarayîşê ma de kewto tengayî bi hesabanê leyminan destûrê pedîyayîşî dayo. La no qiym nêkeno, ma bi nê kayan nêxapîyenê. Rayberîye vizêr birayê xo dîyo la tecrîd dewam keno. Ma sey tepişteyê PKK û PAJKî  do çalakîya xo rê dewam bikerê. Nika 226 embazê ma grevê vêşanîye yê bêdem-bêagêrayîşî de yê. Heman wextî de zîndanê Kurdistan û  Tirkîye de grevê bêdem-biagêrayîşî estî. Çalakîya Leyla Guvene roja xoya 67ine de ya. Wa faşîzmê AKP-MHPyî hole bizano ke Rayberîya ma heqîqetê ma ya. Coka bi milyonan dormayê ey de vera tecrîdî sere wedart o. Şima nêeşkenê mîlyonan tecrîd bikerê. Ma veng danê ke wa heme şarê dinya paştî bidê ma. Xoverdayîşê ma do bireso serkewtişî.”

5 girewteyanê bînan zî dest bi grevê vêşanîye kerd

Hepisxaneyê Tîpê Tyî yê Amedî de zî 5 girewteyanê bînan dest bi grevê vêşanîye kerd.

Hepisxaneyê Tîpê Tyî yê Amedî de girewteyî Recep Bal, Firat Ertunç, Adnan Yîgîttekîn, Faruk Akbay û Mazlum Dîlekî 5ê Çile de dest bi grevê vêşanîye kerdo. Necatî Çepîko ke 11ê Çile de hepisxane ra vejîyayo ANFyî rê qisey kerd û no derheq de malumatî dayî.

Sucê merdimahîye yo

Çepîkî mulaqat de va, hepisxaneyan de tesîrê Rayberê Şarê Kurd Abdullah Ocalanî zaf zêde yo û wina dewam kerd, “Tecrîdê serê Rayber Apoyî sucê merdimahîye yo. Embazanê ma Recep Bal, Firat Ertunç, Adnan Yîgîttekîn, Faruk Akbay û Mazlum Dîlekî, seba ke tecrîd bêro wedaritene 5ê Çile de dest bi grevê vêşanîye kerd. Heta ke tecrîdê serê Rayber Apoyî nêdarîyo we, grev do dewam bikero.”

Rojnameyê Yenî Yaşamî nêdîyeno girewteyan

Çepîkî bale ante rewşa hepisxaneyan ser û va îdareyê hepisxaneyî nêweşan nêbeno revîr û wina dewam kerd,”Destûr nêdanê kitabê ke bi kurdî ameyê nuştene bikewê zere. Rojnameyê Yenî Yaşamî zî nêdîyeno girewteyan. Reyna awa germe zî nêdîyena û wexto ke yena zî yew di saetan de seba 180 kesan nêvejîna. Mudirê Hepisxaneyî Muharrem Kazan girewteyan tehdîd keno û cezayanê keyfîyan înan rê birneno. Ez cezayanê keyfîyan ver hepisxane ra 2 mengî  erey vejîyaya.”

 

MERKEZÊ XEBERAN