Grevê Veyşanî yê pîyê endamê DHKCyî Murat Gunî ke 7ê Teşrîna Peyêna 2016 de qezaya Xozatî ya Dêrsimî de Newala Çetî de netîceyê bombevornayîşî de bi 11 embazanê xo weşîya xo kerd vinî, ramena. Kemal Gun o 70 serre ke seba girewtişê cenazeya lajê xo Mûrat Gunî 78 rojîyo Grevê Veyşanî de yo. Gunî de problemê dîyayîşî destpa kerdî.
Rexmo ke Grevê Veyşanî yê Kemal Gunî kewt roja 78. heta nika yew sermîyanê hikûmet nêşi hetê ci û goşê xo kerd kerr. Ganê Gunî gam bi gam helîyena û weşîya ci bena xiravîn.
Kemal Gunî de nêweşîyê zey tansîyon û janê mobike destpa kerdî. Nayî ra pîya dîyayîşî de zî Gun endî zehmetî anceno. Çimê çep yê Gunî bi temamî girotîya. Kemal Gunî ard ziwan ke, nê problemî muhîm nîyê û waşt ke esteyanê domananê ci bidê. Gunî da zonayen ke, seba teslîmgirewtişê cenazeyan serpirodayîşê ke înan kerdî, pêrokînê ci bênetîce mendî. Walî ra seba pêdîyayîşî randewu ame waştiş, la hona no waşten zî nêameyo qebûlkerden.
Seba Gulmen û Ozakça mesaj
Kemal Gunî seba akademîsyen Nûrîye Gulmen û Semîh Ozakça ke bi sloganê “Karê xo peyser wazenîme” 65. rojîyo Anqara de grevê veyşanî de yê zî jû mesaj rusna. Mesajî de Gunî destegê xo aşkere kerd û wina va: “Ê zî heqê xo wazenê û heqdar ê. Ma tim înan het de yê. Ez veng dana çormeyanê hestîyar yê Tirkîye ke, wayîrê înan bivejyê. Eke ma xo rê vanê ma însan ê, ganî wayîrê înan bivejîme.”Tewr peynî de Gunî va, eke ma wazenê mîyanê azadîye de bicuwe, ganî ma pêro pîya têkoşîn bidê.
DERSIM